ആ രണ്ടു എക്‌സ്ട്രാ റണ്‍ കൂടി കിട്ടിയിരുന്നില്ലെങ്കില്‍ സ്‌കോര്‍ ബോര്‍ഡ് മുഴുവന്‍ പൂജ്യം ആയിരുന്നേനെ... കൗണ്ടി ലീഗില്‍ 2 റണ്‍സിന് ആള്‍ ഔട്ടായി ഒരു ടീം; എതിര്‍ ടീമിന് 258 റണ്‍സിന്റെ പടുകൂറ്റന്‍ വിജയം; ക്യാപ്റ്റന്റെ വിശദീകരണം ഞെട്ടിച്ചു
ഒരു ടീമിലെ എല്ലാവരും പൂജ്യത്തിന് ഔട്ടായി. ഭാഗ്യത്തിന് രണ്ടു റണ്‍സ് എതിര്‍ ടീമിന്റെ സഹായം കൊണ്ട് എക്‌സട്രാസായി സ്‌കോര്‍ ബോര്‍ഡില്‍ കയറി. അല്ലായിരുന്നുവെങ്കില്‍ ഓവറിന്റെ സ്ഥാനം ഒഴികെ മറ്റെല്ലായിടത്തും പൂജ്യമാത്രമുള്ള ഒരു സ്‌കോര്‍ ബോര്‍ഡ് തന്നെ ഉണ്ടാകുമായിരുന്നു. ഇത്രയും ഗതികെട്ടൊരു ടീം ക്രിക്കറ്റ് ചരിത്രത്തില്‍ എന്തിന് ഗല്ലി ക്രിക്കറ്റില്‍ പോലും ഉണ്ടാകുമെന്ന് തോന്നുന്നില്ല. അത്തരമൊരു ഭാഗ്യം കെട്ട ടീമാണ് ബാക്ക്‌ഡെന്‍ ക്രിക്കറ്റ് ക്ലബ്
ഫാല്‍ക്കണ്‍സിനെതിരായ മത്സരത്തിനിറങ്ങിയ ബക്ക്ഡെന് ക്രിക്കറ്റ് ക്ലബ് ആണ് നാണം കെട്ട പരാജയം ഏറ്റുവാങ്ങിയത്. 258 റണ്‍സിന്റെ പടുകൂറ്റന്‍ പരാജയമാണ് ഇതോടെ ബക്ക്ഡെന് നേരിടേണ്ടിവന്നത്. ആദ്യം ബാറ്റ് ചെയ്ത ഫാല്‍ക്കണ്‍സ് 260 റണ്‍സ് എടുത്തപ്പോള്‍ മറുപടി ബാറ്റിംഗിനിറങ്ങിയ ബക്ക്ഡെന് 8.3 ഓവറില്‍ 2 റണ്‍സ് എടുക്കുന്നതിനിടെ ഓള്‍ ഔട്ടാവുകയായിരുന്നു. ബക്ക്‌ഡെനിന്റെ എല്ലാ ബാറ്റ്‌സ്മാനും ഒരു റണ്‍ പോലും സ്‌കോര്‍ ചെയ്യാന്‍ കഴിഞ്ഞില്ല. എല്ലാവരും ഡക്ക് ആണ്. ഫാല്‍ക്കണ്‍സ് എറിഞ്ഞ ഒരു വൈഡും ഒരു ബൈയുമാണ് ആകെ അവരുടെ സ്‌കോര്‍ ബോര്‍ഡിലേക്ക് ചേര്‍ക്കപ്പെട്ടത്.
അതേസമയം, ടീം രണ്ടാം നിര ക്ലബുമായാണ് കളിക്കാന്‍ ഇറങ്ങിയതെന്ന് ബക്ക്ഡെന് ക്യാപ്റ്റന്‍ ജോയല്‍ കിര്‍ഷ്‌നര്‍ പറഞ്ഞു. ''ഞങ്ങള്‍ക്ക് 15 താരങ്ങള്‍ ഉണ്ടായിരുന്നില്ല. ചിലര്‍ക്ക് പരുക്ക് പറ്റിയപ്പോള്‍ മറ്റ് ചിലര്‍ക്ക് ചില കുടുംബ കാര്യങ്ങള്‍ ഉണ്ടായിരുന്നു. കളി തുടങ്ങുമ്പോള്‍ ഞങ്ങള്‍ക്ക് ആകെ 8 പേരേ ഉണ്ടായിരുന്നുള്ളൂ. മുന്‍പ് ഫാല്‍ക്കണ്‍സിനെതിരെ കളിച്ചപ്പോള്‍ 9 റണ്‍സിനാണ് ഞങ്ങള്‍ പരാജയപ്പെട്ടത്.''- ജോയല്‍ പറഞ്ഞു.
https://www.facebook.com/Malayalivartha
