പരമ്പര ഇന്ത്യയ്ക്ക് ...ദക്ഷിണാഫ്രിക്കയ്‌ക്കെതിരായ ട്വന്റി-20 പരമ്പരയിലെ അവസാന മത്സരത്തില്‍ ഇന്ത്യക്ക് 49 റണ്‍സിന്റെ തോല്‍വി. മൂന്ന് മത്സര പരമ്പര ഇന്ത്യ 2-1 എന്ന നിലയില്‍ സ്വന്തമാക്കി സ്‌കോര്‍: ദക്ഷിണാഫ്രിക്ക 227/3(20) ഇന്ത്യ 178/10 (18.3)

228 റണ്‍സ് വിജയലക്ഷ്യം തേടിയിറങ്ങിയ ഇന്ത്യക്ക് നായകന്‍ രോഹിത് ശര്‍മയെ രണ്ടാം പന്തില്‍ത്തന്നെ നഷ്ടമായി. ഒരു റണ്ണെടുത്ത ശ്രേയസ് അയ്യരും 27 റണ്‍സ് നേടിയ ഋഷഭ് പന്തും മടങ്ങിയതോടെ ഇന്ത്യയുടെ സ്‌കോറിംഗ് പതിഞ്ഞ താളത്തിലായി.സൂര്യകുമാര്‍ യാദവ് എട്ട് റണ്‍സിന് പുറത്തായപ്പോള്‍ ദീപക് ചാഹര്‍ വാലറ്റത്ത് 31 റണ്‍സ് നേടി. പ്രോട്ടിയസിനായി ഡ്വെയ്ന്‍ പ്രിട്ടോറിയസ് 26 റണ്‍സ് വഴങ്ങി 3.3 ഓവറില്‍ മൂന്ന് വിക്കറ്റ് വീഴ്ത്തിയപ്പോള്‍ വെയന്‍ പാര്‍ണല്‍, ലുംഗി എന്‍ഗിഡി, കേശവ് മഹാരാജ് എന്നിവര്‍ രണ്ട് വിക്കറ്റ് വീതം നേടി.

നേരത്തെ റൈലീ റൂസോയുടെ വെടിക്കെട്ട് സെഞ്ചുറിയുടെ കരുത്തിലാണ് ദക്ഷിണാഫ്രിക്ക 228 റണ്‍സ് വിജയലക്ഷ്യം പടുത്തുയര്‍ത്തിയത്. ടോസ് നേടി ദക്ഷിണാഫ്രിക്കയെ ബാറ്റിംഗിനയച്ച നായകന്‍ രോഹിത് ശര്‍മയുടെ തീരുമാനം ശരിയാണെന്ന് തോന്നിപ്പിക്കുന്ന രീതിയില്‍ തെംബ ബവൂമയെ ഉമേഷ് യാദവ് നാലാം ഓവറില്‍ പുറത്താക്കി.


എന്നാല്‍ ക്വിന്റന്‍ ഡിക്കോക്കിനൊടൊപ്പം ചേര്‍ന്ന് റൂസോ നടത്തിയ തകര്‍പ്പന്‍ പ്രകടനം പ്രോട്ടിയസിനെ മികച്ച സ്‌കോറിലെത്തിച്ചു. ഡിക്കോക്ക് 43 പന്തില്‍ 68 റണ്‍സെടുത്തു. കന്നി ട്വന്റി-20 സെഞ്ചുറി നേടിയ റൂസോ 48 പന്തില്‍ 100 റണ്‍സെടുത്ത് പുറത്താകാതെ നില്‍ക്കുകയാണുണ്ടായത്. ഒരു വിക്കറ്റ് നേടിയ ദീപക് ചാഹര്‍ നാലോവറില്‍ 48 റണ്‍സ് വഴങ്ങിയപ്പോള്‍ 49 റണ്‍സ് വിട്ടുകൊടുത്ത ഹര്‍ഷല്‍ പട്ടേലിന് വിക്കറ്റൊന്നും നേടാനായില്ല. ഉമേഷ് യാദവ് മൂന്നോവറില്‍ 34 റണ്‍സ് നേടി ഒരു വിക്കറ്റ് നേടി.