ആകാംക്ഷയോടെ..... ടി20 ലോകകപ്പിലെ ആദ്യ മത്സരത്തില്‍ ഇന്ത്യ ഇന്ന് പാകിസ്താനെ നേരിടും.... മെല്‍ബണിലെ ചരിത്രപ്രസിദ്ധമായ ഗ്രൗണ്ടില്‍ ഇന്ത്യന്‍ സമയം ഉച്ചയ്ക്ക് 1.30 നാണ് മത്സരം. അതേസമയം മഴ ശക്തമാകുമോയെന്ന ആശങ്കയിലാണ് ആരാധകര്‍.

യുഎഇയിലെ തോല്‍വിക്ക് മെല്‍ബണില്‍ മറുപടി നല്‍കാനാണ് രോഹിത്തും സംഘവും ഇന്നിറങ്ങുന്നത്. യുദ്ധത്തിന് മുമ്പ് ഇന്ത്യയും പാകിസ്താനും ഓരോ സന്നാഹ മത്സരങ്ങള്‍ വീതം കളിച്ചു. ഇന്ത്യ ഓസ്ട്രേലിയയെ 6 റണ്‍സിന് തോല്‍പ്പിച്ചപ്പോള്‍ പാക്ക് പട ഇംഗ്ലണ്ടിനോട് 6 വിക്കറ്റിന് പരാജയപ്പെട്ടു.

ടി20 ലോകകപ്പ് കണക്കുകള്‍ പരിശോധിച്ചാല്‍ ഇന്ത്യയ്ക്കാണ് മുന്‍തൂക്കം. ആറ് തവണ മുഖാമുഖം എത്തിയപ്പോള്‍ അഞ്ചിലും ഇന്ത്യ ജയിച്ചു. ഒന്നില്‍ മാത്രമാണ് പാകിസ്താന് ജയിക്കാന്‍ കഴിഞ്ഞത്. 2007 മുതലാണ് ടി20 ലോകകപ്പ് സംഘടിപ്പിക്കുന്നത്. ആദ്യ പതിപ്പില്‍ രണ്ട് തവണ ഇരുവരും ഏറ്റുമുട്ടി. രണ്ടിലും ഇന്ത്യ ജയിച്ചു. ഗ്രൂപ്പ് ഘട്ടത്തില്‍ ബൗളൗട്ടിലൂടെ ജയിച്ചപ്പോള്‍, ഫൈനലില്‍ മഹേന്ദ്ര സിംഗ് ധോണിയുടെ ക്യാപ്റ്റന്‍സിയില്‍ പാകിസ്താനെ 5 റണ്‍സിന് പരാജയപ്പെടുത്തി ഇന്ത്യ കപ്പ് ഉയര്‍ത്തി.

2012ലെ ടി20 ലോകകപ്പിലാണ് ഇരുവരും വീണ്ടും ഏറ്റുമുട്ടിയത്. സൂപ്പര്‍ 8 മത്സരത്തില്‍ ഇന്ത്യ എട്ട് വിക്കറ്റിന് പാകിസ്താനെ പരാജയപ്പെടുത്തി. ടി20 ലോകകപ്പില്‍ ഇന്ത്യയുടെ മൂന്നാം വിജയമാണിത്. 2014 ടി20 ലോകകപ്പില്‍ വീണ്ടും ഏറ്റുമുട്ടിയപ്പോള്‍ ഇന്ത്യയ്ക്ക് 7 വിക്കറ്റിന് ജയിക്കാനായി. പാകിസ്താനെതിരെ ഇന്ത്യയുടെ തുടര്‍ച്ചയായ നാലാം വിജയമാണിത്. 2016 ല്‍ ഇരു ടീമുകളും കൊല്‍ക്കത്തയിലെ ചരിത്രപ്രസിദ്ധമായ ഈഡന്‍ ഗാര്‍ഡന്‍സില്‍ ഏറ്റുമുട്ടിയപ്പോള്‍ ഇന്ത്യ 6 വിക്കറ്റിന് വിജയിച്ചു. എന്നാല്‍ 2021ലെ ടി20 ലോകകപ്പില്‍ പാകിസ്താനെതിരെ ഇന്ത്യയുടെ വിജയക്കുതിപ്പ് അവസാനിച്ചു. ദുബായില്‍ നടന്ന മത്സരത്തില്‍ 10 വിക്കറ്റിന് ഇന്ത്യയെ പരാജയപ്പെടുത്തി പാകിസ്താന്‍.