ട്വന്റി20 ലോകകപ്പിലെ വാശിയേറിയ പോരാട്ടത്തില്‍ അവസാന പന്തിൽ വിജയം പിടിച്ചെടുത്തുകൊണ്ട് സിനിമയെ വെല്ലുന്ന ക്ലൈമാക്സ് ആണ് ടീം ഇന്ത്യ കാഴ്ചവച്ചത്. അവസാന ഓവറിൽ ജയിക്കാൻ 16 റൺസ് വേണ്ട മത്സരത്തിൽ ഇന്ത്യൻ ബാറ്റർമാരുടെ മികവും പാക്ക് ബോളർ മുഹമ്മദ് നവാസിന്റെ പിഴവുമാണു ഇന്ത്യയ്ക്കു തുണയായി മാറിയത്. 53 പന്തുകൾ നേരിട്ട വിരാട് കോലി 82 റൺസുമായി പുറത്താകാതെ നിന്നു. ഇപ്പോഴിതാ കൊഹ്‌ലിയെ പ്രശംസിച്ച് രംഗത്ത് എത്തിയിരിക്കുകയാണ് ഡോ. നെൽസൺ ജോസഫ്.

ഫേസ്ബുക്ക് കുറിപ്പ് ഇങ്ങനെ;

സത്യം പറഞ്ഞാൽ ഇന്ന് കോഹ്ലി അടിച്ച് ജയിപ്പിച്ചപ്പൊ കണ്ണ് നിറഞ്ഞു. കാരണം അത്രയ്ക്ക് ആഗ്രഹിച്ചിരുന്നു അയാളുടെ തിരിച്ചുവരവ്. കാരണം ഇതിന് മുൻപ് ഉള്ള കുറച്ച് മാസങ്ങളിൽ അയാളുടെ ബാറ്റിൽ നിന്ന് റൺ വരാൻ വിഷമിച്ചപ്പൊ അത്രയ്ക്ക് അയാൾ ആക്രമണം നേരിട്ടിരുന്നു. അതിന് ആക്കം കൂട്ടാനായി ക്യാപ്റ്റൻസി കയ്യിൽ നിന്ന് പോയതും കളത്തിന് പുറത്തെ വാക്കുകളുമെല്ലാമുണ്ടായി..

അപ്പൊഴൊക്കെ എണ്ണിയാൽ തീരാത്തത്ര നേട്ടങ്ങൾ ഇന്ത്യൻ ടീമിനായി കൊണ്ടുവന്നതാണ് അയാളെന്നോ ഒരല്പം സമയം അയാൾക്ക് കൊടുക്കാമെന്നോ ഒന്നും ആരും ഓർത്തെന്ന് തോന്നിയില്ല. ആരും ഇല്ലാതായിപ്പോയേക്കാവുന്ന സമയം.. അങ്ങനെയൊരു ഇറങ്ങിപ്പോവൽ അയാൾ അർഹിക്കുന്നില്ലെന്ന് നൂറ് ശതമാനം വിശ്വസിച്ചതാണ്.. എങ്ങനെയെങ്കിലും അയാളുടെ ബാറ്റ് വീണ്ടും പഴയപോലെ ശബ്ദിച്ചിരുന്നെങ്കിലെന്ന് ആഗ്രഹിച്ചതാണ്. തുടക്കത്തിൽ 23 പന്തിൽ നിന്ന് 15 റണ്ണുള്ളപ്പൊ എങ്ങാനും ഔട്ടായിരുന്നെങ്കിൽ അപ്പുറത്ത് വീണ നാല് വിക്കറ്റ് കാണാതെ അയാളെ വിമർശിക്കാനും ആളുണ്ടായേനെ.

പക്ഷേ പതിയെ കോഹ്ലി കളിയുടെ നിയന്ത്രണമേറ്റെടുത്തു..അൻപതിലേക്കടുക്കുന്നു..അപ്പൊഴും ഇന്ത്യ ഒരു കര പറ്റിയിട്ടില്ല..അപ്പൊ ആഗ്രഹിച്ചു..കോഹ്ലി അൻപതെടുക്കണമെന്നും കളി ജയിക്കണമെന്നും..

അല്ല, കോഹ്ലി തന്നെ കളി ജയിപ്പിക്കണമെന്ന്... അവസാന മുപ്പത് പന്തിൽ 67 റണ്ണാണ് ആ ബാറ്റിൽ നിന്ന് ഒഴുകിയത്. അവസാന 11 പന്തിൽ 36 ഉം.. റൗഫിനെ അടക്കം എയറിലെത്തിച്ച ഓവർ.. അങ്ങനെ ഒരു രാജകീയമായ തിരിച്ചുവരവ് അയാൾ അർഹിക്കുന്നുണ്ട്. കാരണം അയാളൊരു കിരീടം വയ്ക്കാത്ത രാജാവ് തന്നെയാണ്. വർത്തമാനകാല ഇന്ത്യൻ ക്രിക്കറ്റിലെ, പ്രതിഭയുടെ ധാരാളിത്തമുള്ള..
ഒരേ ഒരു രാജാവ്..