ട്വന്റി-20 ലോകകപ്പില്‍ ഗ്രൂപ്പ് ചാമ്പ്യന്മാരായി സെമിഫൈനലില്‍ പ്രവേശിച്ച് ഇന്ത്യ. സൂപ്പര്‍ 12 റൗണ്ടില്‍ ഇന്നലെ നടന്ന ആദ്യ മത്സരത്തില്‍ നെതര്‍ലാന്‍ഡ്‌സ് 13 റണ്‍സിന് ദക്ഷിണാഫ്രിക്കയെ അട്ടിമറിച്ചപ്പോള്‍ തന്നെ ഇന്ത്യ സെമിയിലെത്തിയിരുന്നു.

പിന്നാലെ ബംഗ്ലാദേശിനെ 5 വിക്കറ്റിന് കീഴടക്കി പാകിസ്ഥാനും സെമിയിലെത്തി. അവസാന മത്സരത്തില്‍ സിംബാബ്വെയെ 71 റണ്‍സിന് കീഴടക്കിയാണ് ഇന്ത്യ ഗ്രൂപ്പ് രണ്ടിലെ ചാമ്പ്യന്‍മാരായത്.

അഡ്‌ലെയ്ഡില്‍ സിംബാബ്വെയ്‌ക്കെതിരെ ആദ്യം ബാറ്റ് ചെയ്ത ഇന്ത്യ സൂര്യകുമാര്‍ യാദവിന്റെയും (പുറത്താകാതെ 25 പന്തില്‍ 61 റണ്‍സ്) കെ.എല്‍ രാഹുലിന്റെയും ( 35 പന്തില്‍ 51 റണ്‍സ്) മികവില്‍ 20 ഓവറില്‍ 5 വിക്കറ്റ് നഷ്ടത്തില്‍ 186 റണ്‍സ് നേടി.

മറുപടിക്കിറങ്ങിയ സിംബാബ്വെ 17.2 ഓവറില്‍ 115 റണ്‍സിന് ഓള്‍ഔട്ടാവുകയായിരുന്നു. ഇന്ത്യയ്ക്കായി അശ്വിന്‍ മൂന്നും മൊഹമ്മദ് ഷമി,ഹാര്‍ദിക് പാണ്ഡ്യ എന്നിവര്‍ രണ്ട് വിക്കറ്റ് വീതവും വീഴ്ത്തി.സൂര്യകുമാര്‍ യാദവാണ് മാന്‍ ഒഫ് ദ മാച്ച്.