രോഹന്‍ പ്രേമിനു പിന്നാലെ മുന്‍ നായകന്‍ സച്ചിന്‍ ബേബിയും അര്‍ധസെഞ്ചറി നേടിയതോടെ, ഛത്തീസ്ഗഡിനെതിരായ രഞ്ജി ട്രോഫി മത്സരത്തില്‍ കേരളം ശക്തമായ നിലയില്‍.

മൂന്നാം ദിനം ഉച്ചഭക്ഷണത്തിനു പിരിയുമ്പോള്‍ ഒന്നാം ഇന്നിങ്‌സില്‍ 71 ഓവറില്‍ മൂന്നു വിക്കറ്റ് നഷ്ടത്തില്‍ 207 റണ്‍സ് എന്ന നിലയിലാണ് കേരളം. സച്ചിന്‍ ബേബി 63 റണ്‍സോടെയും അക്ഷയ് ചന്ദ്രന്‍ നാലു റണ്‍സോടെയും ക്രീസില്‍. രോഹന്‍ പ്രം 77 റണ്‍സെടുത്ത് പുറത്തായി. കേരളത്തിന് ഇപ്പോള്‍ 58 റണ്‍സിന്റെ ലീഡുണ്ട്.

157 പന്തുകള്‍ നേരിട്ട രോഹന്‍ പ്രേം, ഏഴു ഫോറുകള്‍ സഹിതമാണ് 77 റണ്‍സെടുത്തത്. ഇതുവരെ 140 പന്തുകള്‍ നേരിട്ട സച്ചിന്‍ ബേബി, അഞ്ച് ഫോറും ഒരു സിക്‌സും സഹിതമാണ് 63 റണ്‍സെടുത്തത്.

മൂന്നാം വിക്കറ്റില്‍ സച്ചിന്‍ രോഹന്‍ സഖ്യം പടുത്തുയര്‍ത്തിയ സെഞ്ചറി കൂട്ടുകെട്ടാണ് കേരള ഇന്നിങ്‌സിന്റെ നട്ടെല്ല്. 254 പന്തുകള്‍ നേരിട്ട ഇരുവരും കൂട്ടിച്ചേര്‍ത്തത് 123 റണ്‍സ്.