ഇന്ത്യ– ശ്രീലങ്ക ഏകദിന പരമ്പരയിലെ ആദ്യ മത്സരം ഇന്നു ഗുവാഹത്തിയിൽ നടക്കും. ഉച്ചയ്ക്ക് 1.30നാണ് മത്സരം ആരംഭിക്കുന്നത്. ഏകദിന ലോകകപ്പ് വർഷത്തിൽ ഇന്ത്യയുടെ ആദ്യ പരമ്പരയാണിത്. രോഹിത് ശർമയും വിരാട് കോലിയും ടീമിൽ‌ തിരിച്ചെത്തി. സ്റ്റാർ സ്പോർട്സ് 1, എച്ച്ഡി 1, ഹോട്സ്റ്റാർ എന്നിവയിൽ മത്സരം തൽസമയം കാണാം.

‘ട്വന്റി20 ക്രിക്കറ്റ് ഉപേക്ഷിച്ചിട്ടില്ല, ഐപിഎലിനു ശേഷം എന്തു സംഭവിക്കുമെന്നു നോക്കാം’
ശ്രീലങ്കയ്ക്കെതിരായ ട്വന്റി20 പരമ്പര ടീമിലെ 8 പേർ ഏകദിന പരമ്പരയിലില്ല. ക്യാപ്റ്റൻ രോഹിത് ശർമ ഉൾപ്പെടെ ട്വന്റി20യിൽ കളിക്കാത്ത 7 പേർ ഏകദിന ടീമിലുണ്ട്. രോഹിത് ശർമ, വിരാട് കോലി,കെ.എൽ.രാഹുൽ,ശ്രേയസ് അയ്യർ,കുൽദീപ് യാദവ്,മുഹമ്മദ് സിറാജ്, മുഹമ്മദ് ഷമി എന്നിവർ ഏകദിന ടീമിൽ കളിക്കും.

ഗുവാഹത്തി സ്റ്റേഡിയത്തിൽ രാജ്യാന്തര ഏകദിന മത്സരം നടക്കുന്നതു രണ്ടാംതവണയാണ്. 2018ൽ നടന്ന ആദ്യ മത്സരത്തിൽ വെസ്റ്റിൻഡീസിനെതിരെ ഇന്ത്യ 8 വിക്കറ്റ് വിജയം സ്വന്തമാക്കിയിരുന്നു. ബാറ്റിങ് വിക്കറ്റാണ് ഗുവാഹത്തിയിലേത്. 2018ലെ ഇന്ത്യ– വെസ്റ്റിൻഡീസ് ഏകദിനത്തിൽ ആകെ സ്കോർ ചെയ്യപ്പെട്ടത് 648 റൺസ്. കഴിഞ്ഞ ഒക്ടോബറിൽ ഇവിടെ നടന്ന ഇന്ത്യ–ദക്ഷിണാഫ്രിക്ക ട്വന്റി20 മത്സരത്തിൽ പിറന്നത് നാനൂറിലേറെ റൺസ്. ഇവിടെ നടന്ന 3 രാജ്യാന്തര മത്സരങ്ങളിൽ രണ്ടിലും രണ്ടാമത് ബാറ്റു ചെയ്ത ടീം വിജയിച്ചു.