ഇംഗ്ലണ്ടിനെതിരായ ട്വന്റി 20 പരമ്പരയിലെ അഞ്ചാമത്തേയും അവസാനത്തേയും മത്സരത്തില്‍ ഇന്ത്യക്ക് തകര്‍പ്പന്‍ വിജയം. മുംബയില്‍ 150 റണ്‍സിന്റെ റെക്കോഡ് ജയത്തോടെ പരമ്പര 4-1ന് ഇന്ത്യ സ്വന്തമാക്കി. ഇന്ത്യ ഉയര്‍ത്തിയ 248 റണ്‍സ് വിജലക്ഷ്യം പിന്തുടര്‍ന്ന ഇംഗ്ലീഷുകാരുടെ മറുപടി 10.3 ഓവറുകളില്‍ വെറും 97 റണ്‍സില്‍ അവസാനിച്ചു. സെഞ്ച്വറിക്ക് പുറമേ ബൗളിംഗിലും തിളങ്ങിയ അഭിഷേക് ശര്‍മ്മയാണ് പ്ലെയര്‍ ഓഫ് ദി മാച്ച്.

കൂറ്റന്‍ വിജയലക്ഷ്യം പിന്തുടര്‍ന്ന ഇംഗ്ലണ്ടിന് ഗംഭീര തുടക്കമാണ് ഫിലിപ്പ് സാള്‍ട്ട് 55(23) നല്‍കിയത്. അര്‍ദ്ധ സെഞ്ച്വറി നേടിയ താരത്തിന് പിന്തുണ നല്‍കാന്‍ മറുവശത്ത് ആളുണ്ടായില്ല. 10 റണ്‍സ് നേടിയ ജേക്കബ് ബെഥല്‍ മാത്രമാണ് രണ്ടക്കം കടന്ന മറ്റൊരു ബാറ്റര്‍. ബെന്‍ ഡക്കറ്റ് 0(1), ജോസ് ബട്ലര്‍ 7(7), ഹാരി ബ്രൂക് 2(4). ലിയാം ലിവിംഗ്സ്റ്റണ്‍ 9(5), ബ്രൈഡന്‍ കാഴ്സ് 3(4) തുടങ്ങിയ മുന്‍നിര ബാറ്റര്‍മാരില്‍ എല്ലാവരും നിറംമങ്ങി.

ജേമി ഓവര്‍ടണ്‍ 1(3), ജോഫ്ര ആര്‍ച്ചര്‍ 1*(2), ആദില്‍ റഷീദ് 6(6), മാര്‍ക് വുഡ് 0(1) എന്നിങ്ങനെയാണ് മറ്റ് ബാറ്റര്‍മാരുടെ സംഭാവന. ഇന്ത്യക്ക് വേണ്ടി മുഹമ്മദ് ഷമി മൂന്ന് വിക്കറ്റുകള്‍ വീഴ്ത്തിയപ്പോള്‍ വരുണ്‍ ചക്രവര്‍ത്തി, ശിവം ദൂബെ, അഭിഷേക് ശര്‍മ്മ എന്നിവര്‍ രണ്ട് വിക്കറ്റുകള്‍ വീതവും രവി ബിഷ്ണോയ് ഒരു വിക്കറ്റും വീഴ്ത്തി.

നേരത്തെ ടോസ് നേടിയ ജോസ് ബട്‌ലര്‍ ഇന്ത്യയെ ബാറ്റിംഗിന് അയക്കുകയായിരുന്നു. 37 പന്തുകളില്‍ സെഞ്ച്വറി തികച്ച് 54 പന്തുകളില്‍ 134 റണ്‍സ് അടിച്ചെടുത്ത യുവതാരം അഭിഷേക് ശര്‍മ്മയുടെ പ്രകടനമാണ് ഇന്ത്യയെ കൂറ്റന്‍ സ്‌കോറിലെത്തിച്ചത്. 13 സിക്‌സറുകളും ഏഴ് ബൗണ്ടറികളുമാണ് താരം അടിച്ച് കൂട്ടിയത്.ആദ്യ പന്ത് തന്നെ സിക്‌സറിന് പറത്തി മലയാളി താരം സഞ്ജു സാംസണ്‍ നയം വ്യക്തമാക്കി. ജോഫ്ര ആര്‍ച്ചര്‍ എറിഞ്ഞ ആദ്യ ഓവറില്‍ രണ്ട് സിക്‌സും ഒരു ബൗണ്ടറിയും ഉള്‍പ്പെടെ 16 റണ്‍സാണ് സഞ്ജു അടിച്ചെടുത്തത്. എന്നാല്‍ തൊട്ടടുത്ത ഓവറില്‍ മാര്‍ക് വുഡിനെ സിക്‌സറിന് പറത്താനുള്ള ശ്രമം ഡീപ് സ്‌ക്വയറില്‍ ജോഫ്ര ആര്‍ച്ചറുടെ കൈകകളിലൊതുങ്ങിയപ്പോള്‍ 16(7) റണ്‍സ് നേടി താരം പുറത്തായി.

സഞ്ജു പുറത്തായതിന് പിന്നാലെ ഇന്നിംഗ്‌സിന്റെ നിയന്ത്രണം അഭിഷേക് ഏറ്റെടുത്തു. തിലക് വര്‍മയും 24(15) കിട്ടിയ അവസരങ്ങളില്‍ ആക്രമിച്ച് കളിച്ചു. നാലാമനായി എത്തിയ ക്യാപ്റ്റന്‍ സൂര്യകുമാര്‍ യാദവ് 2(3) ഒരിക്കല്‍കൂടി നിരാശപ്പെടുത്തി. മറുവശത്ത് അഭിഷേക് ശര്‍മ്മ 17 പന്തില്‍ അര്‍ദ്ധ സെഞ്ച്വറിയും 37 പന്തുകളില്‍ സെഞ്ച്വറിയും മറികടന്നു.ശിവം ദൂബെ 13 പന്തുകളില്‍ നിന്ന് 30 റണ്‍സ് നേടി മികവ് കാണിച്ചു. ഹാര്‍ദിക് പാണ്ഡ്യ 9(6), റിങ്കു സിംഗ് 9(6) എന്നിവര്‍ക്ക് തിളങ്ങാനായില്ല.

പേരുകേട്ട ഇംഗ്ലീഷ് ബൗളര്‍മാര്‍ എല്ലാവരും നന്നായി തല്ല് വാങ്ങികൂട്ടി. നാലോവറില്‍ 38 റണ്‍സ് വഴങ്ങി മൂന്ന് വിക്കറ്റ് വീഴ്ത്തിയ ബ്രൈഡന്‍ കാഴ്‌സ്, 32 റണ്‍സ് വഴങ്ങി രണ്ട് വിക്കറ്റ് വീഴ്ത്തിയ മാര്‍ക്ക് വുഡ് എന്നിവര്‍ മാത്രമാണ് അല്‍പ്പമെങ്കിലും പിടിച്ചുനിന്നത്. ജോഫ്ര ആര്‍ച്ചര്‍, ആദില്‍ റഷീദ് എന്നിവര്‍ക്ക് ഓരോ വിക്കറ്റ് വീതം ലഭിച്ചു.