രഞ്ജി ചരിത്രത്തില് ഇത് ആദ്യം: ഗുജറാത്തിനെതിരെ രണ്ട് റണ്സിന്റെ നിര്ണ്ണായക ലീഡുമായി കേരളം ഫൈനലിലേക്ക്
രഞ്ജി ട്രോഫിയില് ചരിത്ര നേട്ടവുമായി കേരളം. ഗുജറാത്തിനെതിരെ രണ്ട് റണ്സിന്റെ നിര്ണ്ണായക ലീഡുമായി കേരളം ഫൈനലിലേക്ക്. രഞ്ജി ചരിത്രത്തില് ഇത് ആദ്യമായാണ് കേരളം ഫൈനലിലെത്തുന്നത്. കേരളത്തിന്റെ ആദ്യ ഇന്നിങ്സ് സ്കോറായ 457നെതിരെ 455 റണ്സിന് ഗുജറാത്ത് ഓള് ഔട്ടാവുകയായിരുന്നു. ശേഷിക്കുന്ന മൂന്ന് വിക്കറ്റുകളും വീഴ്ത്തി വിജയത്തിലേക്ക് വഴി തുറന്ന ആദിത്യ സര്വാടെ ആയിരുന്നു അവസാന ദിവസം കേരളത്തിന്റെ താരം. ഫൈനല് പ്രതീക്ഷകള് മങ്ങിത്തുടങ്ങുന്നതിന്റെ ആശങ്കകളുമായിട്ടായിരുന്നു കേരളം അവസാന ദിവസം കളിക്കാനിറങ്ങിയത്. മൂന്ന് വിക്കറ്റ് ശേഷിക്കെ കേരളത്തിന്റെ സ്കോര് മറികടന്ന് ലീഡ് നേടാന് ഗുജറാത്തിന് 29 റണ്സ് കൂടി മതിയായിരുന്നു.
ഇതിനകം നിലയുറപ്പിച്ചിരുന്ന ജയ്മീത് പട്ടേലും സിദ്ദാര്ഥ് ദേശായിയും ചേര്ന്നുള്ള കൂട്ടുകെട്ട് ഗുജറാത്തിനെ ലീഡിലേക്ക് നയിച്ചേക്കുമെന്ന ഘട്ടത്തിലാണ് മൂന്ന് വിക്കറ്റുകളുമായി ആദിത്യ സര്വാടെ ആഞ്ഞടിച്ചത്. 79 റണ്സെടുത്ത ജയ്മീത് പട്ടേലാണ് സര്വാടെയ്ക്ക് മുന്നില് ആദ്യം വീണത്. സര്വാടെയുടെ പന്തില് മൊഹമ്മദ് അസറുദ്ദീന് ഉജ്ജ്വലമായൊരു സ്റ്റംപിങ്ങിലൂടെയാണ് ജയ്മീതിനെ പുറത്താക്കിയത്. വൈകാതെ തന്നെ സിദ്ദാര്ഥ് ദേശായിയും പുറത്ത്. ഒരു വിക്കറ്റ് കയ്യിലിരിക്കെ ലീഡിനായി 12 റണ്സാണ് ഗുജറാത്തിന് വേണ്ടിയിരുന്നത്. കരുതലോടെ ബാറ്റ് വീശി അര്സാന് നാഗസ്വെല്ലയും പ്രിയജിത് സിങ് ജഡേജയും.
ഫീല്ഡിങ് ക്രമീകരിച്ച് സമ്മര്ദ്ദം ശക്തമായി കേരള ബൌളിങ് നിരയും. ഒടുവില് അര്സാന് നാഗസ്വെല്ല അടിച്ച പന്ത് സല്മാന് നിസാറിന്റെ ഹെല്മെറ്റില് തട്ടിയുയര്ന്നത് സച്ചിന് ബേബി കൈയിലൊതുക്കുമ്പോള് പുതിയൊരു ചരിത്രത്തിന്റെ വക്കിലായിരുന്നു കേരളം. ഗുജറാത്ത് 455 റണ്സിന് ഓള് ഔട്ട്. കേരളത്തിന് നിര്ണ്ണായകമായ രണ്ട് റണ്സ് ലീഡ്. കേരളത്തിന് വേണ്ടി ജലജ് സക്സേനയും ആദിത്യ സര്വാടെയും നാല് വിക്കറ്റുകള് വീതം വീഴ്ത്തിയപ്പോള് ബേസില് എന് പിയും നിധീഷ് എം ഡിയും ഓരോ വിക്കറ്റ് വീതവും വീഴ്ത്തി രണ്ടാം ഇന്നിങ്സില് ബാറ്റിങ്ങിന് ഇറങ്ങിയ കേരളത്തിന് തുടക്കത്തില് തന്നെ രണ്ട് വിക്കറ്റുകള് വീണത് ആരാധകരുടെ സമ്മര്ദ്ദം ഉയര്ത്തി.
അക്ഷയ് ചന്ദ്രന് ഒന്പതും വരുണ് നായനാര് ഒരു റണ്ണും എടുത്ത് പുറത്തായി. എന്നാല് രോഹന് കുന്നുമ്മലും ജലജ് സക്സേനയും ചേര്ന്ന് ഇന്നിങ്സ് മുന്നോട്ട് നീക്കി. 32 റണ്സെടുത്ത രോഹനും 10 റണ്സെടുത്ത സച്ചിന് ബേബിയും അടുത്തടുത്ത് മടങ്ങിയെങ്കിലും ജലജ് സക്സേനയും അഹ്മദ് ഇമ്രാനും ചേര്ന്ന് കേരളത്തിന്റെ നില ഭദ്രമാക്കി. നാല് വിക്കറ്റിന് 114 റണ്സെടുത്ത് നില്ക്കെ മല്സരം സമനിലയില് അവസാനിക്കുകയായിരുന്നു. ജലജ് സക്സേന 37ഉം അഹ്മദ് ഇമ്രാന് 14ഉം റണ്സുമായി പുറത്താകാതെ നിന്നു.
https://www.facebook.com/Malayalivartha
