ഐപിഎല്‍ 18ാം സീസണില്‍ വിവിധ മത്സരങ്ങളില്‍ രാജസ്ഥാന്‍ റോയല്‍സിനെ നയിച്ച യുവതാരം റിയാന്‍ പരാഗിന്, നായകനെന്ന നിലയില്‍ പുതിയ ഉത്തരവാദിത്തമേറി. ആഭ്യന്തര ക്രിക്കറ്റ് സീസണിനു മുന്നോടിയായി അസം ക്രിക്കറ്റ് ടീം നടത്തുന്ന നമീബിയന്‍ പര്യടനത്തില്‍ നായകനായി റിയാന്‍ പരാഗിനെ തിരഞ്ഞെടുത്തു. ജൂണ്‍ 21 മുതലാണ് അസം ടീമിന്റെ നമീബിയന്‍ പര്യടനം നടക്കുക.

അസം താരങ്ങള്‍ക്ക് വ്യത്യസ്ത സാഹചര്യങ്ങളില്‍ മത്സരപരിചയം ഉറപ്പാക്കുന്നതിന്റെ ഭാഗമായാണ് ടീമിന്റെ നമീബിയന്‍ പര്യടനമുള്ളത്. റിയാന്‍ പരാഗിനു പുറമേ ഡെനിഷ് ദാസ്, ആകാശ് സെന്‍ഗുപ്ത, പര്‍വേസ് മുഷാറഫ് തുടങ്ങിയവരും നമീബിയയില്‍ പര്യടനം നടത്തുന്ന അസം ടീമില്‍ അംഗങ്ങളാണ്. ഇവര്‍ ഉള്‍പ്പെടെ 24 അംഗ ടീമിനെയാണ് പരമ്പരയ്ക്കായി തിരഞ്ഞെടുത്തിരിക്കുന്നത്. പരിചയസമ്പത്തും യുവത്വവും വിളക്കിച്ചേര്‍ത്ത ടീമിനെയാണ് അസം ക്രിക്കറ്റ് അസോസിയേഷന്‍ നമീബിയന്‍ പര്യടനത്തിനായി തിരഞ്ഞെടുത്തിരിക്കുന്നത്. ടീമില്‍ നാല് വിക്കറ്റ് കീപ്പര്‍ ബാറ്റര്‍മാരെയും ഉള്‍പ്പെടുത്തി.

ജൂണ്‍ 21ന് ആരംഭിക്കുന്ന പര്യടനത്തില്‍ അഞ്ച് ഏകദിന മത്സരങ്ങളാണ് ഉള്‍പ്പെടുത്തിയിട്ടുള്ളത്. ജൂണ്‍ 21, 23, 25, 27, 29 തീയതികളിലാണ് മത്സരങ്ങള്‍ നടത്താനായി നിശ്ചയിച്ചിട്ടുള്ളത്. വിന്‍ഹോക്കിലെ എഫ്എന്‍ബി ക്രിക്കറ്റ് സ്റ്റേഡിയമാണ് പരമ്പരയുടെ വേദിയായിട്ടുള്ളത്. ഐപിഎലില്‍ ഇത്തവണ ഭേദപ്പെട്ട പ്രകടനം പുറത്തെടുത്ത റിയാന്‍ പരാഗ്, 166.52 സ്‌ട്രൈക്ക് റേറ്റില്‍ 393 റണ്‍സാണ് നേടിയത്.