ബാഴ്‌സലോണയും റയല്‍ മാഡ്രിഡും സ്പാനിഷ് ലീഗ് ഫുട്‌ബോളില്‍ കുതിപ്പ് തുടരുന്നു. അല്‍മേരിയയെ മടക്കമില്ലാത്ത നാലു ഗോളിന് തകര്‍ത്ത് ബാഴ്‌സ തുടര്‍ച്ചയായ ഒന്‍പതാം ജയം ആഘോഷിച്ച് ലീഗില്‍ ഒന്നാം സ്ഥാനം ഉറപ്പിച്ചു നിര്‍ത്തി. രണ്ടാം സ്ഥാനത്തുള്ള റയല്‍ ഏകപക്ഷീയമായ രണ്ട് ഗോളിന് റയല്‍ വല്ലസാനോയെയാണ് മറികടന്നത്. റയലിനുവേണ്ടി 300-ാം ഗോള്‍ നേടിയ ക്രിസ്റ്റിയാനോ റൊണാള്‍ഡോയുടെ മികവിലായിരുന്നു ജയം.

ബാഴ്‌സയ്ക്കുവേണ്ടി സുവാരസ് രണ്ടും മെസ്സിയും ബാര്‍ത്രയും ഓരോ ഗോള്‍ വീതവും നേടി. മുപ്പത്തിമൂന്നാം മിനിറ്റില്‍ ലക്ഷ്യം കണ്ട മെസ്സിയാണ് ബാഴ്‌സയുടെ സ്‌കോറിങ്ങിന് തുടക്കമിട്ടത്. ഈ സീസണിലെ മെസ്സിയുടെ മുപ്പത്തിമൂന്നാം ഗോളായിരുന്നു ഇത്. 55, 90 മിനിറ്റുകളിലായിരുന്നു സുവാരസിന്റെ ഗോളുകള്‍. 30 കളികളില്‍ നിന്ന് 74 പോയിന്റോടെയാണ് ബാഴ്‌സ ഒന്നാം സ്ഥാനത്ത് തുടരുന്നത്. രണ്ടാം സ്ഥാനത്തുള്ള റയലിന് 30 കളികളില്‍ നിന്ന് 70 പോയിന്റാണുള്ളത്.