യുവേഫ ചാമ്പ്യൻസ് ലീഗ് ഫുട്ബാളിൽ നിലവിലെ ചാമ്പ്യന്മാരായ ബയേൺ മ്യൂണിക്ക് ഇന്ന് കളത്തിൽ ഇറങ്ങുന്നു. ഇറ്റാലിയൻ സീരി എയിലെ ലാസിയോ ആണ് എതിരാളികൾ. ആറു തവണ ചാമ്പ്യൻസ് ലീഗിൽ മുത്തമിട്ട ബയേൺ ഇത്തവണയും കിരീടം നേടാനുറച്ച് തന്നെയാണ് വരവ്.

2019 ഇൽ ഇംഗ്ലീഷ് ക്ലബ് ലിവർപൂളിനോട് പ്രീ ക്വാർട്ടർ മത്സരത്തിൽ തോറ്റ ശേഷം ഇതുവരെ ചാമ്പ്യൻസ് ലീഗിൽ ബയേൺ തോൽവി എന്തെന്ന് അറിഞ്ഞിട്ടില്ല. എ ഗ്രൂപ്പിൽ നിന്ന് മത്സരിച്ച ബയേൺ ഒരു സമനിലയും അഞ്ച് ജയവുമായി ഗ്രൂപ്പ് ചാമ്പ്യന്മാരായാണ് പ്രീ ക്വാർട്ടർ മത്സരത്തിൽ എത്തുന്നത്.

ലാസിയോ ആകട്ടെ നാല് സമനിലയും രണ്ടു ജയവും ആയി എഫ് ഗ്രൂപ്പിൽ നിന്ന് ഡോർട്ട്മുണ്ടിന് പിന്നിലായി രണ്ടാം സ്ഥാനക്കാരായാണ് വരവ്.
ബുന്ദസ് ലീഗ മത്സരത്തിൽ കഴിഞ്ഞ രണ്ടു കളികളിൽ ആയി ജയിക്കാൻ പറ്റാത്തത് ബയേണിന് നിരാശ ഉളവാക്കുന്നതാണ്. അതിന്റെ ക്ഷീണം തീർക്കാനാകും ജർമ്മൻ വമ്പന്മാരുടെ ശ്രമം.

ലാസിയോയെ വില കുറച്ച് കാണുന്നില്ല എന്ന് ബയേൺ പരിശീലകൻ ഹാൻസി ഫ്ലിക്ക് വാർത്താസമ്മേളനത്തിൽ അറിയിച്ചു. കോവിഡും പരിക്കുകളും ടീമിനെ അലട്ടുന്നുണ്ട്. എന്നിരുന്നാലും ടീമിന്റെ മികച്ച പ്രകടനം പുറത്തെടുക്കാനാകും ശ്രമം എന്ന് ഫ്ലിക്ക് അഭിപ്രായപ്പെട്ടു.

ഇറ്റാലിയൻ സീരി എയിൽ നിലവിൽ അഞ്ചാം സ്ഥാനത്താണ് ലാസിയോ. കഴിഞ്ഞ അഞ്ചു മത്സരങ്ങളിൽ ഒരു തോൽവിയും അഞ്ചു ജയവുമായി മികച്ച ഫോമിലാണ് ലാസിയോ. ബയേൺ നിരയിൽ തോമസ് മുള്ളർ,ബെഞ്ചമിൻ പവാർഡ്,ടോളിസോ,ഡഗ്ലസ് കോസ്റ്റ എന്നിവർ കളിക്കാൻ ഉണ്ടാവില്ല.

മറ്റൊരു മത്സരത്തിൽ സ്പാനിഷ് ക്ലബ് അത്ലറ്റിക്കോ മാഡ്രിസ്,ഇംഗ്ലീഷ് ക്ലബ് ചെൽസിയെ നേരിടും. ലൂയിസ് സുവാരസിന്റെ നേതൃത്വത്തിൽ മികച്ച പ്രകടനം കാഴ്ച്ച വെക്കുന്ന അത്ലറ്റിക്കോ നിലവിൽ ലീഗിൽ ഒന്നാം സ്ഥാനത്താണ്. ചെൽസിയാകട്ടെ മോശം പ്രകടനമാണ് കാഴ്ച വെച്ചുകൊണ്ടിരിക്കുന്നത്‌.

നിലവിൽ അഞ്ചാം സ്ഥാനത്താണ് അവർ. ടീമിന്റെ മോശം പ്രകടനത്തിന്റെ പേരിൽ അടിക്കടി പരിശീലകരെ മാറ്റിക്കൊണ്ടിരിക്കുകയാണ് ചെൽസി. രണ്ട് മത്സരങ്ങളും ബുധനാഴ്ച്ച പുലർച്ചെ 1:30 ന് സോണി നെറ്റ് വർക്കിലാണ് മത്സരങ്ങൾ സംപ്രേക്ഷണം ചെയ്യുക.