യുവേഫ ചാമ്പ്യൻസ് ലീഗ് ആദ്യ പാദ പ്രീ ക്വാർട്ടർ മത്സരങ്ങളിൽ വമ്പൻമാർക്ക് ജയം. പതിമൂന്ന് തവണ ജേതാക്കളായ റയൽ മാഡ്രിഡ് ഏകപക്ഷീയമായ ഒരു ഗോളിന് ഇറ്റാലിയൻ ക്ലബ് അറ്റ്ലാൻഡയെ തോല്പിച്ചപ്പോൾ മറ്റൊരു മത്സരത്തിൽ എതിരില്ലാത്ത രണ്ടു ഗോളുകൾക്ക് ഇംഗ്ലീഷ് ക്ലബ്ബ് മാഞ്ചസ്റ്റർ സിറ്റി ജർമ്മൻ ക്ലബ്ബ് ബൊറൂസ്സിയ മോൺഷെൻ ഗ്ലാഡ്ബാക്കിനെ പരാജയപ്പെടുത്തി.

അറ്റ്ലാൻഡയുടെ മൈതാനത്ത് നടന്ന മത്സരത്തിൽ 86 ആം മിനിട്ടിൽ റയൽ താരം ഫെർലാൻഡ് മെൻഡിയാണ് ഗോൾ നേടിയത്.
നേരത്തെ പതിനേഴാം മിനിറ്റിൽ അറ്റ്ലാൻഡാ താരം റെമോ ഫ്രൂലർ ചുവപ്പ് കാർഡ് കണ്ടു പുറത്ത് പോയി. എങ്കിലും 86 ആം മിനിറ്റ് വരെ ഗോൾ ഒന്നും വഴങ്ങാതെ പിടിച്ചു നിൽക്കാൻ അവർക്ക് കഴിഞ്ഞു.

കളിയിൽ എല്ലാ തരത്തിലും ആധിപത്യം പുലർത്തിയത് റയൽ തന്നെയാണ്. 19 ഷോട്ടുകളാണ് അറ്റ്ലാൻഡാ ഗോൾ പോസ്റ്റിന് നേരെ റയൽ തൊടുത്തു വിട്ടത്.
മോൺഷെൻ ഗ്ലാഡ്ബാക്കിന്റെ തട്ടകത്തിൽ വെച്ച് നടന്ന മറ്റൊരു മത്സരത്തിൽ മാഞ്ചസ്റ്റർ സിറ്റിക്ക് രണ്ടു ഗോളിന്റെ തകർപ്പൻ ജയം. ബുന്ദസ് ലീഗയിൽ ബയേൺ മ്യൂണിക്ക് ഉൾപ്പെടെയുള്ള വമ്പന്മാരെ തോൽപ്പിച്ചു വന്ന ഗ്ലാഡ്ബാക്കിനെ തകർത്തത് സിറ്റിക്ക് നല്ല ആത്മവിശ്വാസം നൽകുന്നു.

സിറ്റിക്ക് വേണ്ടി 29 ആം മിനിറ്റിൽ ബെർണാഡോ സിൽവയും 65 ആം മിനിറ്റിൽ ഗബ്രിയേൽ ജെസ്യുസും ഗോൾ നേടി.
രണ്ടാം പാദ മത്സരങ്ങൾ മാർച്ച് പതിനേഴിന് നടക്കും.