കേരള പ്രീമിയര്‍ ലീഗ് ഫുട്ബോളിന്റെ ഏഴാം പതിപ്പിന് മാർച്ച് ആറാം തീയ്യതി തുടക്കമാകും. കേരളാ പ്രീമിയര്‍ ലീഗിന്റെ ഔദ്യോഗിക പ്രഖ്യാപന ചടങ്ങ് ഇന്ന് കൊച്ചിയില്‍ വെച്ച്‌ നടന്നു.

റാംകോ സിമന്റ്സ് ആണ് ഇത്തവണയും കേരള പ്രീമിയര്‍ ലീഗ് മുഖ്യ സ്പോണ്‍സര്‍. കോവിഡ് ആയതിനാല്‍ ഹോം- എവേ മത്സരം നടത്തുന്നതിന് പകരം രണ്ട് വേദികളില്‍ ആയാകും ഇത്തവണ മത്സരങ്ങൾ പൂർത്തീകരിക്കുക. തൃശ്ശൂരും കൊച്ചിയും ആണ് വേദികള്‍. 12 ടീമുകൾ മത്സരിക്കുന്ന ലീഗില്‍ രണ്ട് ഗ്രൂപ്പുകളില്‍ ആയാകും പോരാട്ടം.

ഗ്രൂപ്പ് എയില്‍ ബാസ്കോ, ഗോകുലം കേരള, കേരള പോലീസ്, ലൂക്ക സോക്കര്‍, എഫ് സി കേരള, സാറ്റ് തിരൂര്‍ എന്നീ ക്ലബുകള്‍ ആണ് മാറ്റുരക്കുന്നത്. ഗ്രൂപ്പ് എയിലെ മത്സരങ്ങള്‍ക്ക് തൃശ്ശൂര്‍ വേദിയാകും.

ഗ്രൂപ്പ് ബിയില്‍ നിലയില്‍ ലീഗ് ചാമ്പ്യന്മാരായ കേരള ബ്ലാസ്റ്റേഴ്സ്, എം എ കോളേജ്, ഗോള്‍ഡന്‍ ത്രഡ്സ്, കെ എസ് ഇ ബി, കേരള യുണൈറ്റഡ്, കോവളം എഫ് സി എന്നീ ടീമുകൾ പരസ്പരം മത്സരിക്കും. ഈ ക്ലബുകള്‍ എറണാകുളം മഹാരാജാസ് ഗ്രൗണ്ടില്‍ വെച്ചാകും ഏറ്റുമുട്ടുക.

ഉദ്ഘാടന മത്സരത്തില്‍ മാര്‍ച്ച്‌ 6ന് കേരള യുണൈറ്റഡ് കോവളം എഫ് സിയെ നേരിടും. കഴിഞ്ഞ സീസണില്‍ കേരള ബ്ലാസ്റ്റേഴ്സ് റിസേര്‍വ്സ് ആയിരുന്നു കിരീടം നേടിയത്. കേരള യുണൈറ്റഡ്, ബാസ്കോ ഒതുക്കുങ്ങല്‍ എന്നീ ടീമുകള്‍ ആദ്യമായാണ് കേരള പ്രീമിയര്‍ ലീഗില്‍ എത്തുന്നത്.

ഇത്തവണ നടക്കുന്ന എല്ലാ മത്സരങ്ങളും യൂടൂബ് വഴിയും ഫേസ്ബുക്ക് വഴിയും തത്സമയം സംപ്രേക്ഷണം ചെയ്യും.