സ്പാനിഷ് ഫുട്ബാള് ഇതിഹാസം ഡേവിഡ് വിയ്യ ഇനി ഇന്ത്യന് സൂപര് ലീഗിലേക്ക്; ഒഡിഷ എഫ്.സി ഉപദേശകനും താരങ്ങളുടെ റിക്രൂട്ട്മെന്റ് മാനേജറുമായി പുതിയ റോൾ
സ്പാനിഷ് ഫുട്ബാൾ പ്രേമികളുടെ പ്രിയതാരം ഇനി സൂപ്പർലീഗിലേക്ക്. സ്പെയിനിനെ ഫുട്ബാള് ലോകകിരീടത്തോളം ഉയര്ത്തിയ ഇതിഹാസ താരം ഡേവിഡ് വിയ്യ ആണ് ഇന്ത്യന് സൂപര് ലീഗിലേക്ക്. ഒഡിഷ എഫ്.സി ഉപദേശകനും താരങ്ങളുടെ റിക്രൂട്ട്മെന്റ് മാനേജറുമായാണ് എത്തുന്നത്.
ക്ലബിന്റെ പ്രസിഡന്റായി രാജ് അത്വാള് എത്തിയതിനു പിന്നാലെയാണ് ഐ.എസ്.എല്ലിലെ താരത്തിളക്കമായി വിയ്യയുടെ വരവ്. സ്പെയിനിന്റെ എക്കാലത്തെയും വലിയ ഗോള്വേട്ടക്കാരനായ വിയ്യ കരിയറില് വിവിധ ക്ലബുകള്ക്കൊപ്പവും ദേശീയ ജഴ്സിയിലുമായി 15 കിരീടങ്ങള് സ്വന്തമാക്കിയ താരമാണ്.
ബാഴ്സലോണ, അത്ലറ്റികോ മഡ്രിഡ് എന്നിവക്കായി ബൂട്ടുകെട്ടി. ഏറ്റവുമൊടുവില് ജപ്പാന് ക്ലബായ വിസെല് കോബെക്കുവേണ്ടി കളിച്ചാണ് 39കാരന് കളി നിർത്തിയത്. ലോകകിരീടത്തിനു പുറമെ ദേശീയ ജഴ്സിയില് യൂറോ കപും ബാഴ്സ മുന്നേറ്റം നയിച്ച് ചാമ്ബ്യന്സ് ലീഗ്, ലാ ലിഗ കിരീടങ്ങളും സ്വന്തമാക്കിയിട്ടുണ്ട്.
കഴിഞ്ഞ സീസണ് വരെ പന്തുതട്ടിയതിനാല് താരത്തിന് കളിക്കാനും അവസരമൊരുക്കിയായിരുന്നു ഒഡിഷ കരാറിലെത്തിയതെങ്കിലും കളിക്കുന്നില്ലെന്നും ഉപദേശകന്റെ റോള് മതിയെന്നും തീരുമാനിക്കുകയായിരുന്നു.
ക്ലബിന് ആഗോള മുഖം നല്കുകയാണ് പ്രധാനമായും വിയ്യയുടെ വരവുകൊണ്ട് ലക്ഷ്യമിടുന്നതെന്നാണ് അധികൃതരുടെ വിശദീകരണം. മുന് ഹെഡ് കോച്ച് ജോസപ് ഗോംബാവു, വിക്ടര് ഓനേറ്റ് എന്നിവരും വിയ്യക്കൊപ്പം ക്ലബിനോടൊപ്പം ഉണ്ടാകും.
https://www.facebook.com/Malayalivartha
