മലപ്പുറം പൂക്കോട്ടൂര്‍ സ്വദേശി സി.പി.ഷിഹാബ്(27) ജന്മനാ ഇരു കൈകളും കാലുകളും ഇല്ലാത്ത ആളാണ്. ഷിഹാബ് മഹേന്ദ്രസിങ് ധോണിയുടെ കടുത്ത ആരാധകനുമാണ്.

ഇന്നു പിറന്നാള്‍ ആഘോഷിക്കുന്ന ധോണിക്ക് ഷിഹാബ് വ്യത്യസ്തമായ സമ്മാനം ഒരുക്കിയിരിക്കയാണ്്. ധോണി പുല്‍മൈതാനത്ത് ബാറ്റുമായി നില്‍ക്കുന്നതു പോലെയുള്ള കാര്‍ഡ് ബോര്‍ഡ് ശില്‍പമാണ് ഷിഹാബ് ഒരുക്കിയത്.

3 മണിക്കൂറെടുത്ത് ശില്‍പം തയാറാക്കുന്നതിന്റെ വിഡിയോയും യൂ ട്യൂബില്‍ പങ്കുവച്ചിട്ടുണ്ട്. ഭിന്നശേഷിക്കാരനായ ഒരു ധോണി ഫാനിന്റെ ജീവിതം പറയുന്ന ഷോര്‍ട്ഫിലിം 2018-ല്‍ ചെയ്തിരുന്നു. ഏകദേശം 15 ലക്ഷം പേരാണ് ഈ വിഡിയോ കണ്ടത്.

പക്ഷേ, ധോണി മാത്രം കണ്ടില്ല. ഇത്തവണത്തെ പിറന്നാള്‍ സമ്മാനമെങ്കിലും കാണുമെന്നാണ് ഷിഹാബിന്റെ പ്രതീക്ഷ. ഷിഹാബ് കാത്തിരിക്കയാണ്...