ഇന്ത്യന്‍ ക്രിക്കറ്റ് താരവും ബിസിസിഐ പ്രസിഡന്റ് കൂടിയായ ഗാംഗുലിക്ക് ഇന്ന് 48-ാം പിറന്നാളാണ്. ഗാംഗുലിയുടെ 48–ാം ജന്മദിനത്തോട് അനുബന്ധിച്ചായിരുന്നു ചാറ്റ് ഷോയിൽ ചെറുപ്പത്തിലേ ഒരു അനുഭവം പങ്കുവച്ചിരിക്കുകയാണ് താരം. ചെറുപ്പത്തിൽ വീട്ടിൽവച്ച് പ്രേതബാധയുമായി ബന്ധപ്പെട്ടുണ്ടായ അനുഭവം പങ്കുവച്ചിരിക്കുകയാണ് താരം. ‘സ്പോർട്സ്ക്രീഡ’യുടെ ‘ഫ്രീ ഹിറ്റ്’ ചാറ്റ് ഷോയിൽ സംസാരിക്കുമ്പോഴാണ് ചെറുപ്പത്തിൽ വീട്ടിൽവച്ച് പ്രേതബാധയുമായി ബന്ധപ്പെട്ടുണ്ടായ അനുഭവത്തെക്കുറിച്ച് ഗാംഗുലിയുടെ വെളിപ്പെടുത്തൽ.

അവതാരകരുടെ ഒരു ചോദ്യത്തോട് പ്രതികരിക്കുമ്പോഴാണ് വീട്ടിൽ പ്രേതത്തെ കണ്ട അനുഭവവും ഗാംഗുലി പങ്കുവച്ചത്. അവതാരകർ അവിശ്വസനീയതോടെ ആവർത്തിച്ച് ചോദിച്ചപ്പോൾ ആ സംഭവം ഗാംഗുലി വിവരിച്ചു. ‘ചെറുപ്പത്തിൽ സ്വന്തം വീട്ടിൽ പ്രേതത്തെ കണ്ട അനുഭവം എനിക്കുണ്ട്. അന്ന് എന്റെ വീട്ടിൽ സഹായത്തിനായി ഒരു ചെറുപ്പക്കാരനുണ്ടായിരുന്നു. ഒരു ഞായറാഴ്ച ദിവസം വൈകുന്നേരം ഞാൻ കുടുംബാംഗങ്ങളോടൊപ്പം മുകളിലെ നിലയിൽ ഇരിക്കുകയായിരുന്നു. അന്നെനിക്ക് പന്ത്രണ്ടോ പതിമൂന്നോ വയസ് പ്രായം കാണും. അപ്പോൾ അവർക്ക് ചായ വേണമെന്ന് തോന്നി. വീട്ടിൽ സഹായത്തിനു നിൽക്കുന്ന പയ്യനോട് ചായയുണ്ടാക്കാൻ പറയാൻ എന്നെയാണ് ഏൽപ്പിച്ചത്.’

‘ഞാൻ നേരെ അടുക്കയിൽ ചെന്നെങ്കിലും അയാളെ അവിടെ കണ്ടില്ല. ഇക്കാര്യം പറഞ്ഞപ്പോൾ മുകളിൽ പോയി ടെറസിലുണ്ടോ എന്നു നോക്കാൻ പറഞ്ഞു. അവിടെ നോക്കിയപ്പോഴും കണ്ടില്ല. അന്ന് വീടിനു ചുറ്റും ഏതാനും കുടിലുകളുണ്ടായിരുന്നു. അവിടെ നോക്കാമെന്നു കരുതി പോകുമ്പോൾ ടെറസിന്റെ വക്കിലൂടെ അയാൾ അതിവേഗം ഓടുന്നതുകണ്ടു. ആറു നിലയുള്ള കെട്ടിടമായിരുന്നു അത്. അവിടെനിന്നെങ്ങാനും താഴെ വീണാൽ പൊടിപോലും കിട്ടില്ലെന്ന് ഉറപ്പ്.’

‘വക്കിലൂടെ ഓടാതെ ഇറങ്ങിവരാൻ ഞാൻ അലറി. ഫലമുണ്ടായില്ല. ഇതോടെ ഞാൻ ഓടി അങ്കിളിന്റെ അടുത്തെത്തി. അയാൾക്ക് ഭ്രാന്തുപിടിച്ചെന്ന് തോന്നുവെന്ന് പറഞ്ഞു. ഞാൻ എല്ലാവരെയും കൂട്ടി തിരിച്ചെത്തിയെങ്കിലും അയാളെ കണ്ടില്ല. മുകളിലൂടെ ഓടുന്നതിനിടെ ഏതെങ്കിലും ഭാഗത്ത് വീണുപോയിരിക്കാമെന്ന് ഞങ്ങൾ ഊഹിച്ചു. വീണിട്ടുണ്ടെങ്കിൽ മരിച്ചിട്ടുണ്ടാകുമെന്ന് എനിക്ക് ഉറപ്പായിരുന്നു. ഇതോടെ എവിടെയാണ് വീണുകിടക്കുന്നതെന്ന് ഞങ്ങൾ തിരഞ്ഞു.’

‘അന്ന് ഞങ്ങളുടെ വീടിനോടു ചേർന്ന് വലിയ പനകൾ കുറേ ഉണ്ടായിരുന്നു. തിരച്ചിലിനിടെ ഞങ്ങൾ നോക്കുമ്പോഴുണ്ട്, ആ പനകളിലൊന്നിന്റെ ഓലയിൽ അയാൾ കിടക്കുന്നു. അന്ന് അയാൾക്ക് ഏതാണ്ട് 30 വയസ്സോളം പ്രായമുണ്ടെന്ന് ഓർക്കണം’ – ഗാംഗുലി പറഞ്ഞു. ‘ഓലയിലോ’ എന്ന് അവതാരക ചോദിച്ചപ്പോൾ അതെയെന്ന് ഗാംഗുലി പ്രതികരിച്ചു.

‘ഉടൻതന്നെ അയാളെ താഴെയിറക്കാൻ ഫയൽ ഫോഴ്സിനെ വിളിച്ചു. ഞങ്ങളെല്ലാവരും താഴെയിറങ്ങാൻ അയാളെ നിർബന്ധിച്ചെങ്കിലും ഫലമുണ്ടായില്ല. അനുനയിപ്പിക്കാന്‍ കഴിയാതെ പോയതോടെ ഫയർ ഫോഴ്സ് ജീവനക്കാർ ഏണിവച്ച് പനയിൽ കയറി. തുടർന്ന് കയറുകൊണ്ട് ബന്ധിച്ചാണ് അയാളെ താഴെയെത്തിച്ചത്. ഉടൻതന്നെ ആശുപത്രിയിലേക്കു മാറ്റുകയും ചെയ്തു. പിറ്റേന്ന് എന്തോ അവധി ദിനമായിരുന്നു. വൈകീട്ട് അഞ്ചു മണിയോടെ അയാൾ ആശുപത്രിയിൽനിന്ന് തിരിച്ചെത്തി. അയാളെ കണ്ടതും എല്ലാവരും ഭയന്ന് ഓടാൻ തുടങ്ങി. ആരും ഓടരുതേയെന്ന് അയാൾ അപേക്ഷിച്ചു. ചില ദിവസങ്ങളിൽ തന്റെ അമ്മ ഇങ്ങനെ ശരീരത്തിൽ കയറിക്കൂടാറുണ്ടെന്ന് അയാൾ വിശദീകരിച്ചു. അങ്ങനെ ചെറുപ്പത്തിൽത്തന്നെ പ്രേതത്തെ കാണാൻ അവസരം കിട്ടിയ വ്യക്തിയാണ് ഞാൻ’ എന്നും ഗാംഗുലി തന്റെ അനുഭവം പങ്കുവച്ചു.