അമേരിക്കന്‍ പൗരനാണ്, എന്നാലും ഈ നേട്ടം ഇന്ത്യക്കാര്‍ക്കും അഭിമാനിക്കാം. ലോകത്തിലെ ഏറ്റവും പ്രായം കുറഞ്ഞ ചെസ് ഗ്രാന്‍ഡ് മാസ്റ്ററായി മാറിയിരിക്കുകയാണ് ഇന്ത്യന്‍ വംശജനായ 12 വയസുകാരന്‍ അഭിമന്യു മിശ്ര. ഹംഗറിയിലെ ബുഡാപെസ്റ്റില്‍ നടന്ന ചെസ് ടൂര്‍ണമെന്റിലാണ് അഭിമന്യു മിശ്ര നേട്ടം കൈവരിച്ചത്. 15കാരനായ ഗ്രാന്‍ഡ് മാസ്റ്റര്‍ ലിയോണ്‍ ലൂക്ക് മെന്‍ഡോണ്‍ക്കെയെയാണ് അഭിമന്യു പരാജയപ്പെടുത്തിയത്.

19 വര്‍ഷമായി സെര്‍ജി കര്‍ജാകിന്‍സിന്റെ പേരിലായിരുന്ന റെക്കോര്‍ഡാണ് അഭിമന്യു മിശ്ര തന്റെ പേരിലാക്കിയത്. 2002 ഓഗസ്റ്റ് 12നായിരുന്നു സെര്‍ജി കര്‍ജാകിന്‍ ലോകത്തിലെ ഏറ്റവും പ്രായം കുറഞ്ഞ ഗ്രാന്‍ഡ് മാസ്റ്ററെന്ന പദവി സ്വന്തമാക്കിയത്. 12 വയസും 7 മാസവുമായിരുന്നു റെക്കോര്‍ഡ് നേടുമ്പോള്‍ സെര്‍ജിയുടെ പ്രായം. അഭിമാനനേട്ടം കൈവരിച്ച അഭിമന്യുവിനെ കര്‍ജാകിന്‍സിന്‍ അഭിനന്ദിക്കുകയും ചെയ്തു.

ന്യൂ ജേഴ്സിയില്‍ നിന്നുള്ള അഭിമന്യു 12 വയസും 4 നാലുമാസവും 25 ദിവസവും പ്രായവുമുള്ളപ്പോഴാണ് നേട്ടം തന്റെ പേരിലാക്കിയത്. 2009 ഫെബ്രുവരി 5നാണ് അഭിമന്യുവിന്റെ ജനനം. നിരവധി പേരാണ് അഭിമന്യുവിനെ പ്രശംസിച്ച് എത്തിയിരിക്കുന്നത്. തന്റെ ആദ്യത്തേയും രണ്ടാമത്തേയും ഗ്രാന്‍ഡ് മാസ്റ്റര്‍ നേട്ടമാണ് അഭിമന്യു ബുഡാപെസ്റ്റില്‍ കാഴ്ച വച്ചത്. രണ്ടര വയസ് മുതല്‍ തന്നെ അഭിമന്യു ചെസ് പരിശീലിക്കുന്നുണ്ട്. ന്യൂസ്‌ജേഴ്‌സിയിലെ കിംഗ് ആന്റ് ക്യൂണ്‍ സ്‌കൂളില്‍ പഠിക്കുന്ന അഭിമന്യുവിന്റെ ചെസ് കോച്ച് ഗ്രാന്റ്മാസ്റ്റര്‍ മഹേഷ് ചന്ദ്രനാണ്.

മൂന്നാം ഗ്രാന്‍മാസ്റ്റര്‍ നോം സ്വന്തമാക്കിയാണ് അഭിമന്യുവിന്റെ ചരിത്ര നേട്ടം. ഏപ്രില്‍ മാസത്തില്‍ വെസെര്‍കെപ്സോ ടൂര്‍ണമെന്റിലും മെയ് മാസത്തില്‍ ഫസ്റ്റ് സാറ്റര്‍ഡേ ടൂര്‍ണമെന്റിലുമായിരുന്നു ഈ നേട്ടം. 15കാരനായ ഗ്രാന്‍ഡ് മാസ്റ്റര്‍ ലിയോണ്‍ ലൂക്ക് മെന്‍ഡോണ്‍ക്കെയെയാണ് അഭിമന്യു പരാജയപ്പെടുത്തിയത്.