അഭ്യൂഹങ്ങൾക്ക് വിരാമമിട്ട് ധോണി; ഐപിഎല്ലില്‍ നിന്നും വിരമിക്കുന്നു എന്ന ആരാധകരുടെ ഊഹാപോഹങ്ങള്‍ക്ക് മറുപടിയുമായി ക്യാപ്റ്റന്‍ കൂള്‍ രംഗത്ത്
ഐപിഎല്ലില്‍ നിന്നും ധോണി വിരമിക്കുന്നു എന്ന ആരാധകരുടെ ഊഹാപോഹങ്ങള്‍ക്ക് മറുപടിയുമായി ക്യാപ്റ്റന്‍ കൂള്‍ രംഗത്ത്. ഇത് തന്റെ അവസാന സീസണ്‍ അല്ലെന്നും ഇനിയും ഒരു സീസണില്‍ കൂടെ മത്സരിക്കുമെന്ന മറുപടിയാണ് ചെന്നൈ സൂപ്പര്‍ കിംഗ്‌സ് ക്യാപ്റ്റന്‍ അറിയിച്ചത്. ഇന്ത്യന്‍ സിമന്റ്‌സിന്റെ 75-ാം വാര്‍ഷികാഘോഷ പരിപാടിയിലാണ് ധോണി ഇക്കാര്യം വ്യക്തമാക്കിയത്.
'ചെന്നൈയ്‌ക്ക് വേണ്ടി കളിക്കുമ്ബോള്‍ ആരാധകര്‍ക്കായി ഒരു വിടവാങ്ങല്‍ മത്സരം സംഘടിപ്പിക്കും. അന്താരാഷ്‌ട്ര ക്രിക്കറ്റില്‍ നിന്നും ആരാധകര്‍ക്ക് ലഭിക്കാഞ്ഞത് അന്ന് നല്‍കുന്നതാണ്.' അന്തരാഷ്‌ട്ര ക്രിക്കറ്റില്‍ നിന്നും വിരമിക്കുന്നതിനു മുന്‍പ് എന്തുകൊണ്ടാണ് ഇന്ത്യയ്‌ക്കായി ഒരു വിടവാങ്ങല്‍ മത്സരത്തില്‍ കളിക്കാഞ്ഞത് എന്ന ചോദ്യത്തിന് ഉത്തരമായാണ് ക്യപ്റ്റന്‍ കൂള്‍ ഈ പ്രസ്താവന നടത്തിയത്.
ഇതിനര്‍ത്ഥം ധോണി ഐപിഎല്ലില്‍ നിന്നും ഈ വര്‍ഷം വിരമിക്കില്ല. അടുത്ത സീസണിനു മുന്നോടിയായി താരങ്ങളുടെ ലേലത്തില്‍ ധോണി ഉണ്ടാവില്ലെന്നാണ് അഭ്യൂഹങ്ങള്‍ പരന്നത്. എന്നാല്‍ ധോണി തന്നെ ഇതിനു മറുപടി നല്‍കിയത് ആരാധകര്‍ക്ക് വലിയ ആശ്വാസമാണ് നല്‍കിയിരിക്കുന്നത്. ആരാധകരെ ഞെട്ടിച്ച്‌ 2020 ഓഗസ്റ്റ് 15നാണ് ധോണി അന്താരാഷ്‌ട്ര ക്രിക്കറ്റില്‍ നിന്നും വിരമിച്ചത്. വളരെ അധികം വിഷമത്തോടെയായിരുന്നു ആരാധകര്‍ ധോണിയുടെ വിരമിക്കല്‍ ഉള്‍ക്കൊണ്ടത്.
https://www.facebook.com/Malayalivartha
