ടി 20 ലോകകപ്പില്‍ സ്‌കോട്ട് ലാന്‍ഡിനെതിരായ നിര്‍ണായക മത്സരം ഇന്ന് നടക്കാനിരിക്കെ ഇന്ത്യന്‍ നായകന്‍ വിരാട് കോഹ്ലിക്ക് 33ാം ജന്മദിനാശംസകളുമായി കായികപ്രേമികള്‍ രംഗത്ത്.

1988 നവംബര്‍ അഞ്ചിനാണ് വിരാട് ജനിച്ചത്. 'എ പ്രൌഡ് ഹസ്ബന്‍ഡ് ആന്‍ഡ് ഫാദര്‍ എന്ന് ട്വിറ്ററില്‍ സ്വയം വിശേഷിപ്പിക്കുന്ന കോഹ്ലിക്ക് മകള്‍ ജനിച്ച ശേഷമുള്ള ആദ്യ പിറന്നാള്‍ കൂടിയാണിത്. ടി 20 ലോകകപ്പില്‍ സെമിയില്‍ ഇന്ത്യന്‍ ടീമെത്തുന്ന കാര്യത്തില്‍ ആശങ്ക നിലനില്‍ക്കേയാണ് കോഹ്ലിയുടെ പിറന്നാള്‍ എത്തുന്നത്.

ലോകകപ്പ് സന്നാഹ മത്സരങ്ങള്‍ വിജയിച്ചു തുടങ്ങിയ ടീം, ആദ്യ രണ്ടു മത്സരങ്ങളിലും പരാജയപ്പെട്ടിരുന്നു. എന്നാല്‍ അഫ്ഗാനിസ്താനെതിരെ ടൂര്‍ണമെന്റിലെ ഏറ്റവും വലിയ സ്‌കോര്‍ നേടി വിജയവഴിയില്‍ തിരിച്ചുവരികയായിരുന്നു.

സ്‌കോട്ലാന്‍ഡിനെതിരെയും വിജയം തുടരാനാണ് ശ്രമം. എന്നാല്‍ ഇതര ടീമുകളുടെ പ്രകടനം കൂടി സെമിഫൈനല്‍ പ്രവേശനത്തില്‍ നിര്‍ണായകമായേക്കും.

ടി 20 ലോകകപ്പോടെ കോഹ്ലി നായക സ്ഥാനം ഒഴിയുകയാണ്. ഏകദിനത്തിലും ക്യാപ്റ്റന്‍സി ഒഴിയും. രോഹിത് ശര്‍മ നായകനാകണമെന്ന് പുതിയ കോച്ച് രാഹുല്‍ ദ്രാവിഡ് അഭിപ്രായപ്പെട്ടിരുന്നു.

ഐ.പി.എല്ലില്‍ ബാംഗ്ലൂര്‍ റോയല്‍ ചാലഞ്ചേഴ്സ് ക്യാപ്റ്റന്‍സി കോഹ്ലി ഒഴിയുകയാണ്. എതായാലും സാമൂഹിക മാധ്യമങ്ങളില്‍ കോഹ്ലിയ്ക്ക് പിറന്നാള്‍ ആശംസ നേര്‍ന്ന് ആരാധകരുടെ പോസ്റ്റുകളും വീഡിയോകളും പ്രചരിക്കുന്നു.