മലയാളികളുടെ പ്രിയപ്പെട്ട ക്രിക്കറ്റ് താരമാണ് സഞ്ജു സാംസൺ. സഞ്ജുവിന്റെ ഇന്ത്യൻ ടീം പ്രവേശനം ആഗ്രഹിക്കുന്നവരാണ് ഓരോ മലയാളികളും. ഐ.പി.എല്ലിലൂടെ നിരവധി ആരാധകരെ നേടിയെടുത്ത താരം ഇപ്പോൾ രാജസ്ഥാൻ റോയൽസ് ടീമിൽ അംഗമാണ്. 2021 ലെ ഐ.പി.എൽ മത്സരങ്ങളിൽ ടീമിനെ നയിച്ചതും സഞ്ജുവാണ്.

അടുത്ത ദിവസങ്ങളിലായി സോഷ്യൽ മീഡിയയിൽ നിറഞ്ഞുനിൽക്കുന്ന ചർച്ച സഞ്ജുവിന്റെ ടീം മാറ്റാതെ പറ്റിയാണ്. നിലവിൽ രാജസ്ഥാൻ ടീമിൽ അംഗമായ സഞ്ജു ചെന്നൈ സൂപ്പർ കിങ്സിലേക്ക് ചുവടുമാറ്റാൻ ഒരുങ്ങുന്നതായാണ് റിപ്പോർട്ടുകൾ. സഞ്ജുവിന്റെ കൂടുമാറ്റത്തെപ്പറ്റിയുള്ള സൂചനകൾ തന്നത് താരം തന്നെയാണ്. ഇൻസ്റ്റഗ്രാമിൽ രാജസ്ഥാൻ റോയൽസിന്റെ പേജ് അൺഫോളോ ചെയ്ത താരം ചെന്നൈ സൂപ്പർ കിങ്സിന്റെ പേജ് ഫോളോ ചെയ്തതാണ് ക്രിക്കറ്റ് ലോകത്ത് പുതിയ ചർച്ചകൾക്ക് വഴിവച്ചത്. നേരത്തെയും സഞ്ജുവിനെ സ്വന്തമാക്കാൻ താൽപ്പര്യം പ്രകടിപ്പിച്ച് ചെന്നൈ രംഗത്ത് വന്നിരുന്നു.

എന്നാൽ പുതിയ സാഹചര്യങ്ങൾ പരിഗണിക്കുമ്പോൾ വലിയ മാറ്റങ്ങൾക്കാണ് ഐ.പി.എൽ വേദിയാകാൻ പോകുന്നത് .അടുത്ത സീസൺ മുതൽ പുതിയ രണ്ട് ടീമുകൾ കൂടിയെത്തുന്നതോടെ വലിയ മാറ്റങ്ങൾ നിലവിലെ ടീമുകളിൽ സംഭവിക്കും. ഉടൻ നടക്കാനായി പോകുന്ന മെഗാ ലേലത്തിൽ പുതിയ ടീമുകളെ കുറിച്ചുള്ള അന്തിമ തീരുമാനമാകുമെന്നാണ് പ്രതീക്ഷിക്കുന്നത്.

സഞ്ജു രാജസ്ഥാൻ റോയൽസിന്റെ പേജ് അൺഫോളോ ചെയ്തതോടെ സംഭവത്തിൽ പ്രതികരണവുമായി നിരവധി ടീം ആരാധകരാണ് രംഗത്തെത്തിയത്. സംഭവത്തിൽ ഔദ്യോഗികമായി പ്രതികരിക്കാൻ രാജസ്ഥാൻ റോയൽസിന്റെ അടുത്ത വൃത്തങ്ങൾ ഇതുവരെ തയ്യാറായിട്ടില്ല.