ഐസിസി ടെസ്റ്റ് റാങ്കിങ്ങില്‍ വമ്ബന്‍ നേട്ടം കൊയ്ത് രവീന്ദ്ര ജഡേജ. ഓള്‍ റൗണ്ടര്‍മാരുടെ പട്ടികയില്‍ ജഡേജ ഒന്നാം സ്ഥാനത്തേയ്ക്ക് മടങ്ങിയെത്തിയിരിക്കുന്നു.വിന്‍ഡീസിന്റെ ജേസണ്‍ ഹോള്‍ഡറെയും ഇന്ത്യയുടെ രവിചന്ദ്ര അശ്വിനെയും പിന്തള്ളിയാണ് ജഡേജ ഒന്നാമതെത്തിയത്.

ശ്രീലങ്കയ്‌ക്കെതിരായ മൊഹാലി ടെസ്റ്റിലെ തകര്‍പ്പന്‍ പ്രകടനമാണ് ജഡേജയെ ഒന്നാമതെത്തിച്ചത്. പുറത്താകാതെ 175 റണ്‍സ് നേടിയ താരം ഒന്‍പത് വിക്കറ്റും സ്വന്തമാക്കിയിരുന്നു. ജഡേജ ടെസ്റ്റില്‍ നേടിയ ഏറ്റവും ഉയര്‍ന്ന സ്‌കോറാണിത്. രണ്ടാം തവണയാണ് ജഡേജ ഓള്‍ റൗണ്ടര്‍മാരുടെ പട്ടികയില്‍ ഒന്നാമതെത്തുന്നത്. 2017 ഓഗസ്റ്റിലും ജഡേജ ഒന്നാമതെത്തിയിരുന്നു.

അതേസമയം, ടെസ്റ്റ് ബാറ്റ്സ്മാന്മാരുടെ പട്ടികയില്‍ വിരാട് കൊഹ്ലി രണ്ട് സ്ഥാനം മെച്ചപ്പെടുത്തി അഞ്ചാമതെത്തി. മൊഹാലി ടെസ്റ്റില്‍ 96 റണ്‍സ് നേടിയ റിഷബ് പന്തും റാങ്കിങ്ങില്‍ ആദ്യ പത്തിലേക്ക് എത്തി. കഴിഞ്ഞ മത്സരത്തില്‍ റണ്‍സ് കണ്ടെത്താന്‍ വിഷമിച്ച ക്യാപ്റ്റന്‍ രോഹിത് ശര്‍മ്മ ആറാം സ്ഥാനത്തേയ്ക്ക് പിന്തള്ളപ്പെട്ടു. ഓസ്‌ട്രേലിയയുടെ മാര്‍നസ് ലബുഷാനെ തന്നെയാണ് ഇപ്പോഴും ബാറ്റ്സ്മാന്മാരുടെ ടെസ്റ്റ് റാങ്കിങ്ങില്‍ ഒന്നാമത്. ടെസ്റ്റ് ബൗളിംഗിലെ ആദ്യ സ്ഥാനങ്ങളില്‍ മാര്‍നസ് മാറ്റമില്ലാതെ തുടരുന്നു. ഓസ്ട്രേലിയയുടെ പാറ്റ് കമ്മിന്‍സ് ഒന്നാമതുള്ള പട്ടികയില്‍ ഇന്ത്യയുടെ രവിചന്ദ്ര അശ്വിനാണ് രണ്ടാം സ്ഥാനത്ത്. സൗത്ത് ആഫ്രിക്കയുടെ കഗിസോ റബാഡയാണ് മൂന്നാമതുള്ളത്. ടെസ്റ്റ് ടീം റാങ്കിങ്ങില്‍ 119 പോയിന്റോടെ ആസ്‌ട്രേലിയ ഒന്നാമത് തുടരുന്നു. 116 പോയിന്റുമായി ഇന്ത്യ തൊട്ടു പിന്നിലുമുണ്ട്.