ഫേയിസ്ബുക്ക് പ്രവര്ത്തനരഹിതമായി; ടെലഗ്രാമില് പുതിയതായി അക്കൗണ്ടെടുത്തത് ലക്ഷങ്ങള്
കഴിഞ്ഞ ബുധനാഴ്ച മുതലാണ് ലോകമെമ്പാടുമുള്ള ചില ഉപയോക്താക്കള്ക്ക് ഫേസ്ബുക്ക്, മെസഞ്ചര്, ഇന്സ്റ്റഗ്രാം എന്നിവ മണിക്കൂറുകളോളം പ്രവര്ത്തനരഹിതമായത്. ചിലയിടങ്ങളില് പ്രശ്നം ഇപ്പോഴും തുടരുന്നുണ്ട്. ഈ സമയത്താണ് കൂടുതല് ആളുകള് മെസേജിംഗ് പ്ലാറ്റ്ഫോമായ ടെലഗ്രാമിനെ തേടിയെത്തിയത്. ഇതോടെ ടെലഗ്രാമില് ഉപഭോക്താക്കളുടെ എണ്ണം കുതിച്ചുയര്ന്നു. ഫേസ്ബുക്ക് ഏതാനും മണിക്കൂറുകള് പണിമുടക്കിയതോടെ ഏറ്റവും കൂടുതല് നേട്ടമുണ്ടാക്കിയത് ടെലഗ്രാമാണ്. കഴിഞ്ഞ 24 മണിക്കൂറിനുള്ളില് ടെലഗ്രാമില് 3 മില്യണ് പുതിയ ഉപഭോക്താക്കള് എത്തിയെന്നാണ് കരുതുന്നത്. പ്രതിവര്ഷം 200 മില്യണ് സജീവ ഉപയോക്താക്കളാണ് ടെലിഗ്രാമിനുള്ളത്. പുതിയ ഉപഭോക്താക്കളെ സ്വാഗതം ചെയ്തതിനൊപ്പം ടെലഗ്രാമില് എല്ലാ ഉപഭോക്താക്കളുടെയും സ്വകാര്യത ഉറപ്പു വരുത്തുമെന്നും കമ്പനി വ്യക്തമാക്കി.
എന്നാല് ഫേസ്ബുക്ക് നേരിടുന്ന സാങ്കേതിക തടസം ഉടന് പരിഹരിക്കുമെന്ന് അധികൃതര് ട്വിറ്ററിലൂടെ അറിയിച്ചിരുന്നു. 48 മണിക്കൂര് കഴിഞ്ഞിട്ടും ഫേസ്ബുക്ക്, ഇന്സ്റ്റാഗ്രാം സര്വീസുകള് പരിപൂര്ണമായും പുനസ്ഥാപിക്കാന് സാധിക്കാത്തതിനെ തുടര്ന്ന് പരസ്യക്കാര്ക്ക് പണം തിരികെ നല്കും. ഫേസ്ബുക്കിന്റെ പ്രവര്ത്തനം തടസ്സപ്പെട്ടതിനെ തുടര്ന്ന് പരസ്യങ്ങളും പ്രത്യക്ഷപ്പെട്ടിരുന്നില്ല. ഇത് പരസ്യ വിപണിയെയും കാര്യമായി ബാധിച്ചു. തുടര്ന്നാണ് കമ്പനികള്ക്ക് പണം തിരികെ നല്കാന് തീരുമാനിച്ചത്.
ഫേസ്ബുക്കും ഇന്സ്റ്റഗ്രാമും നിലച്ചെങ്കിലും വാട്സ്ആപ്പിന് തകരാറൊന്നും സംഭവിച്ചിരുന്നില്ല. ഫെയ്സ്ബുക്കില് ലോഗിന് ചെയ്യാന് ശ്രമിച്ചപ്പോള് പരാജയപ്പെട്ടതോടെയാണ് ഫെയ്സ്ബുക്ക് പ്രവര്ത്തിക്കുന്നില്ലെന്ന കാര്യം പലരും ട്വിറ്ററിലൂടെ പങ്കുവെച്ചത്. ഫേസ്ബുക്കിന്റെയും ഇന്സ്റ്റഗ്രാമിന്റെയും ഡെസ്ക്ടോപ് സൈറ്റുകള്ക്ക് പുറമേ മൊബൈല് ആപ്പുകളും പ്രവര്ത്തിച്ചിരുന്നില്ല.
ടെലഗ്രാം മെസഞ്ചര് ഉപഭോക്താക്കളുടെ വിവരങ്ങള് നല്കുന്നതിനുള്ള ഗവണ്മെന്റിന്റെ അഭ്യര്ത്ഥന നിരസിച്ചതിനെ തുടര്ന്ന് ചില രാജ്യങ്ങളില് ടെലഗ്രാമിന് നിയന്ത്രണങ്ങള് ഏര്പ്പെടുത്തിയിട്ടുണ്ട്. റഷ്യ, ഇറാന്, ചൈന തുടങ്ങിയ രാജ്യങ്ങളാണ് ടെലഗ്രാമിന് നിയന്ത്രണങ്ങള് ഏര്പ്പെടുത്തിയിരിക്കുന്നത്. 2013ല് ആരംഭിച്ച ടെലഗ്രാം മെസഞ്ചര് സ്വന്തം രാജ്യമായ റഷ്യയില് ബ്ലോക്ക് ചെയ്തതിനെ തുടര്ന്ന് നിയമപരവും സാങ്കേതികപരവുമായ നടപടികളിലൂടെ അത് മറികടക്കാന് കമ്പനി ശ്രമിച്ചു. എന്നാല് ഇത് പരാജയപ്പെടുകയും സ്വന്തം നാട് വിട്ട് പോകേണ്ടിയുവന്നു.
വെബ്സൈറ്റുകള് നിരീക്ഷിക്കുന്ന Downdetector.comന്റെ റിപ്പോര്ട്ട് അനുസരിച്ച് അമേരിക്ക, യൂറോപ്പ്, തെക്കേ അമേരിക്ക, ഏഷ്യ എന്നിവിടങ്ങളിലെ ഭൂരിഭാഗം പ്രദേശങ്ങളിലുമാണ് ഫേസ്ബുക്ക് പണിമുടക്കിയത്. ട്വിറ്ററില് ഉപഭോക്താക്കള് ഫേസ്ബുക്ക് പ്രവര്ത്തനരഹിതമായി എന്നറിയിക്കാനായി #facebookdown ഹാഷ്ടാഗ് ഉപയോഗിക്കാന് തുടങ്ങിയതോടെ കഴിഞ്ഞ ദിവസം അമേരിക്കയിലെ ഏറ്റവും മികച്ച ട്രെന്ഡിംഗ് ടോപ്പിക്കായി ഇത് മാറി. ഇന്ത്യയില് ഫേസ്ബുക്കിന്റെ പ്രവര്ത്തനമാണ് തടസ്സപ്പെട്ടത്. ഇന്സ്റ്റഗ്രാം പ്രവര്ത്തിച്ചിരുന്നു.
https://www.facebook.com/Malayalivartha
