അമേരിക്കൻ ഇരുചക്ര വാഹന നിർമ്മാതാക്കളായ ഹാർലി ഡേവിഡ്​സൺ വിപണയില്ലാത്തതിനാൽ ഇന്ത്യ വിടുന്നതായി റിപ്പോർട്ടുകൾ. ഇപ്പോഴുള്ള കനത്ത നഷ്ടവും ഭാവിയിൽ ഇത്​ മെച്ചപ്പെടാനുള്ള സാധ്യതയിലാതാകുകയും ചെയ്തതോടെയാണ് കമ്പനിയുടെ പിൻമാറ്റമെന്നാണ്​ സൂചന.

ഹരിയാനയിലെ ബാവലിലെ ഹാർലിഡേവിഡ്​സൺ പ്ലാൻറ്​ ഔട്ട്​സോഴ്​സ്​ ചെയ്യുന്നതിനായി കമ്പനി ചർച്ചകൾ ആരംഭിച്ചുവെന്ന്​ 'ദ ഹിന്ദു' റിപ്പോർട്ട്​ ചെയ്യുന്നു. കമ്പനിക്ക്​ വിൽപന കൂടുതലുള്ള 50 വിപണികളിൽ മാത്രം ശ്രദ്ധ കേന്ദ്രീകരിക്കാനാണ്​ തീരുമാനം.

കഴിഞ്ഞ സാമ്പത്തിക വർഷത്തിൽ 2,500 ബൈക്കുകളാണ്​ ഹാർലി ഡേവിഡ്​സൺ ഇന്ത്യയിൽ വിറ്റത്. നിരത്തിലുള്ള ബൈക്കുകളുടെ സർവീസിനുള്ള സംവിധാനം തുടരുമെന്ന്​ റിപ്പോർട്ടുണ്ട്​. 2018ൽ 3,413 ബൈക്കുകൾ വിൽക്കാൻ ഹാർലിഡേവിഡ്​സണ്​ സാധിച്ചുവെങ്കിലും 2019ൽ വിൽപന 2,676 യൂണിറ്റുകളായി കുറഞ്ഞിരുന്നു. ഹാർലി ഡേവിഡ്​സണിന്റെ 750 സി.സിയിൽ താഴെയുള്ള ബൈക്കുകളാണ്​ ഇന്ത്യയിൽ കൂടുതലായി വിൽക്കുന്നത്​.

അതേസമയം, ഇന്ത്യയിൽ നിന്നുള്ള പിന്മാറ്റത്തെ കുറിച്ച്​ പ്രതികരിക്കാൻ ഹാർലിഡേവിഡ്​സൺ ഇതുവരെ തയാറായിട്ടില്ല.