ചരിത്രത്തിലെ വിസ്മയാവഹമായ ഒരു ഗ്രഹസംഗമത്തിന് 3-ാം തീയതി പുലര്‍ച്ചെ ആകാശം സാക്ഷ്യം വഹിക്കും. അന്നേ ദിവസം ചൊവ്വാ ഗ്രഹത്തിന് അടുത്തായി ചന്ദ്രനെ കാണാം. പടിഞ്ഞാറന്‍ ചക്രവാളത്തോട് അടുക്കുംതോറും ഈ ഗ്രഹ-ചന്ദ്ര സംഗമത്തിന്റെയും അടുപ്പം കൂടുന്നതായി അനുഭവപ്പെടും.

ചൊവ്വാഗ്രഹം കഴിഞ്ഞ രണ്ടു വര്‍ഷത്തിനിടെ ഭൂമിയോട് ഏറ്റവും അടുക്കുന്ന സമയമാണിത്. അതു കൊണ്ടു തന്നെ പൂര്‍ണ്ണചന്ദ്രശോഭയിലും ചുവന്ന ഗ്രഹമായ ചൊവ്വയെ എളുപ്പം തിരിച്ചറിയാം. അന്ന് പുലര്‍ച്ചെ ഏതാണ്ട് അഞ്ചു മണിയോടെ പടിഞ്ഞാറന്‍ മാനത്ത് ഈ സംഗമം കാണുമ്പോള്‍ കിഴക്കന്‍ മാനത്ത് മറ്റൊരു സംഗമവും നടക്കും.

ചിങ്ങം (Leo) രാശിയിലെ ഏറ്റവും തിളക്കമുള്ള നക്ഷത്രമായ മകവും (Regulus) മാനത്ത് ഏറവും തിളക്കത്തില്‍ കാണുന്ന ശുക്ര (Venus) ഗ്രഹവും ഏറ്റവും അടുപ്പത്തിലായിരിക്കും. ഇനി 2028-ല്‍ മാത്രമേ ശുക്രന്‍ ഈ നക്ഷത്രത്തോട് ഇതു പോലെ അടുത്തു കാണപ്പെടുകയുള്ളൂ. ഈ കാഴ്ചകള്‍ എല്ലാം വെറും കണ്ണു കൊണ്ടു തന്നെ കാണാമെങ്കിലും ശുക്ര- മക സംഗമം ബൈനോക്കുലറില്‍ കാണുക രസാവഹമായിരിക്കും.

മകം ഭൂമിയില്‍ നിന്ന് ഏതാണ്ട് 79 പ്രകാശ വര്‍ഷം അകലെയാണ്. ഇത് 4 നക്ഷത്രങ്ങളുടെ ഒരു കൂട്ടമാണെന്ന് വാനനിരീക്ഷകനായ സുരേന്ദ്രന്‍ പുന്നശ്ശേരി പറഞ്ഞു. ചന്ദ്രന്‍ ഏതാനും ലക്ഷം കിമീ മാത്രം അകലെയാണെങ്കിലും മറ്റുള്ളവ കോടിക്കണക്കിന് കിമീ അകലെയാണ്.