കവി റഫീക്ക് അഹമ്മദ് തിരക്കഥയെഴുതുന്നു, ഹിന്ദി സിനിമയ്ക്കു വേണ്ടി എഴുതുന്ന തിരക്കഥയ്ക്കായി ഗുരുവായൂര്‍ ക്ഷേത്രനടയില്‍ വച്ച് കടലാസും പേനയും ഏറ്റു വാങ്ങി!
മലയാളിക്ക് ഒട്ടേറെ കവിതകളും ചലച്ചിത്രഗാനങ്ങളും സമ്മാനിച്ച കവി റഫീക്ക് അഹമ്മദ് ആദ്യമായി തിരക്കഥയെഴുതുന്നു. ഹിന്ദി സിനിമയ്ക്കു വേണ്ടിയാണ് തിരക്കഥ. വിജീഷ് മണിയാണ് കഥയെഴുതി സംവിധാനം ചെയ്യുന്നത്.
വ്യത്യസ്തമായ പ്രണയകഥയാണ് പ്രമേയം. വിജീഷ് മണിയില്‍ നിന്ന് ഗുരുവായൂര്‍ ക്ഷേത്രനടയില്‍ കണ്ണന്റെ മുന്നില്‍ വച്ച് കടലാസും പേനയും ഏറ്റു വാങ്ങി ഇന്നലെ രചനയ്ക്ക് തുടക്കം കുറിച്ചു. ബാബുരാജ് ഗുരുവായൂര്‍ ഒപ്പമുണ്ടായിരുന്നു.
പ്രണയത്തിന്റെ മഹനീയ സങ്കല്‍പമാണ് ശ്രീകൃഷ്ണന്‍ എന്നതിനാലാണ് ഇവിടെ നിന്നു രചന തുടങ്ങാന്‍ കാരണമെന്ന് റഫീക്ക് പറഞ്ഞു.
ഹിന്ദി സംവിധായകരായ അബ്ബാസ്-മസ്താന്‍ സഹോദരങ്ങളാണ് ചിത്രത്തിന്റെ അണിയറയില്‍. മലയാളത്തില്‍ എഴുതുന്ന തിരക്കഥ ഹിന്ദിയിലേക്കു വിവര്‍ത്തനം ചെയ്ത് സംഭാഷണങ്ങള്‍ നല്‍കും.
ന്യൂഡല്‍ഹിയിലും വയനാട്ടിലുമായി നവംബറില്‍ ചിത്രീകരണം തുടങ്ങും. പ്രണയദിനമായ ഫെബ്രുവരി 14-ന് റിലീസ് ചെയ്യാവുന്ന രീതിയില്‍ ചിത്രീകരണം പൂര്‍ത്തിയാക്കാനാണ് ഉദ്ദേശ്യം. നായകന്‍ ഹിന്ദിയില്‍ നിന്നും നായിക മലയാളത്തില്‍ നിന്നുമാകും.
https://www.facebook.com/Malayalivartha
