മാതൃഭൂമി സ്റ്റാര് ആന്ഡ് സ്റ്റൈല് അഭിമുഖം നിഷേധിച്ച് അനു ഇമ്മാനുവേല്,ഞാന് അങ്ങനെ പറഞ്ഞിട്ടില്ല
ഞാന് പറഞ്ഞത് വളച്ചൊടിച്ചു. അങ്ങനെ പറഞ്ഞിട്ടില്ല. നിലപാട് മാറ്റവുമായി അനു ഇമ്മാനുവേല്. മലയാള സിനിമ നായികമാരെ മാനിക്കാറില്ലെന്ന് താന് പറഞ്ഞിട്ടില്ലെന്ന് നടി അനു ഇമ്മാനുവേല്. മാതൃഭൂമി പ്രസിദ്ധീകരണമായ സ്റ്റാര് ആന്ഡ് സ്റ്റൈല് മാസികയില് തന്റെ പേരില് വന്ന അഭിമുഖത്തിനെതിരെയാണ് അനു ഇമ്മാനുവേല് രംഗത്തെത്തിയിരിക്കുന്നത്. പെണ്ണിനെ മാനിക്കാത്ത മലയാള സിനിമ എന്ന തലക്കെട്ടില് അനു ഇമ്മാനുവേലിന്റെ കവര് ചിത്രത്തോടെയായിരുന്നു സ്റ്റാര് ആന്ഡ് സ്റ്റൈല് ജൂണ് ലക്കം. ഉള്പ്പേജിലുള്ള അഭിമുഖത്തില് സ്ത്രീകളായ ആര്ട്ടിസ്റ്റുകളുടെ അഭിപ്രായം സ്വീകരിക്കാനുള്ള മനസ്ഥിതി മലയാള സിനിമാലോകത്തിനില്ലെന്ന് അനു ഇമ്മാനുവല് പറയുന്നുണ്ട്. 'ഞങ്ങള് പറയുന്നത് തെറ്റായാലും ശരിയായാലും അനുസരിച്ചാല് മതി എന്നാണ് പലരുടെയും നിലപാട്. എന്നാല് അന്യഭാഷകളില് നമ്മുടെ നിര്ദേശങ്ങള് സന്തോഷത്തോടെ മറ്റുള്ളവര് കേള്ക്കും. അത്തരം അന്തരീക്ഷത്തില് എങ്ങനെ മുന്നോട്ടുപോകണം എന്ന ആശങ്കയിലാണ് ഞാന്.' എന്നാണ് അനു ഇമ്മാനുവേലിന്റെതായി മാസിക നല്കിയ അഭിമുഖം. തലക്കെട്ടില് പറഞ്ഞത് പോലെ ഞാന് ഒരിക്കലും പറഞ്ഞിട്ടില്ലെന്ന് അനു പറയുന്നു. ഇന്സ്റ്റഗ്രാം അക്കൗണ്ടിലൂടെയാണ് അനു ഇമ്മാനുവേലിന്റെ പ്രതികരണം. കവര് ചിത്രം കൊള്ളാം പ്രസ്താവന തെറ്റാണ് എന്നും അനു ഇമ്മാനുവേല് പറയുന്നു
സ്വപ്നസഞ്ചാരി എന്ന ചിത്രത്തില് ജയറാമിന്റെ മകളായി അഭിനയിച്ച അനു ഇമ്മാനുവേല് ആക്ഷന് ഹീറോ ബിജു എന്ന ചിത്രത്തിലൂടെയാണ് നായികയായി എത്തിയത്. അമല് നീരദ് സംവിധാനം ചെയ്ത ദുല്ഖര് സല്മാന് ചിത്രത്തില് ആദ്യം നായികയായി നിശ്ചയിച്ചിരുന്നത് അനുവിനെ ആയിരുന്നു. അനുവിനെ ഉള്പ്പെടുത്തി കുറച്ചു സീനുകള് ഷൂട്ട് ചെയ്തിരുന്നു. പിന്നീട് കാര്ത്തികാ മുരളീധരനെ അമല്നീരദ് നായികയാക്കി. തെലുങ്ക് ചിത്രത്തിന് ഡേറ്റ് നല്കിയതിനാലാണ് അമല് നീരദ് ചിത്രം ഉപേക്ഷിച്ചതെന്നാണ് അനു ഇമ്മാനുവേല് നല്കുന്ന വിശദീകരണം.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
