മമ്മൂട്ടി ചിത്രം കസബയില്‍ സ്ത്രീകളെ അവഹേളിക്കുന്ന രംഗങ്ങളും സംഭാഷണങ്ങളും ഉണ്ടെന്നാരോപിച്ച് വനിതാ കമ്മീഷന്‍ നോട്ടീസ് അയച്ചു. നടന്‍ മമ്മൂട്ടി, ചിത്രത്തിന്റെ സംവിധായകന്‍ നിഥിന്‍ രഞ്ജി പണിക്കര്‍, നിര്‍മാതാവ് ആലീസ് ജോര്‍ജ് എന്നിവര്‍ക്കെതിരെയാണ് നോട്ടീസ് അയച്ചിരിക്കുന്നത്.

കെ.സി.റോസക്കുട്ടിയുടെ അധ്യക്ഷതയില്‍ ചേര്‍ന്ന വനിതാ കമ്മീഷന്‍ യോഗത്തിലാണ് ഇതു സംബന്ധിച്ച് തീരുമാനമെടുത്തത്. ആവിഷ്‌കാര സ്വതന്ത്ര്യം സ്ത്രീകളെ അപമാനിക്കാനുളള സ്വാതന്ത്ര്യമല്ലെന്ന് യോഗത്തില്‍ അഭിപ്രായമുയര്‍ന്നു.

ഇത്തരം കാര്യങ്ങള്‍ ഒഴിവാക്കാന്‍ ശ്രദ്ധ പുലര്‍ത്തണമെന്ന് സെന്‍സര്‍ ബോര്‍ഡിനോടും സിനിമാരംഗത്തെ പ്രധാന സംഘടനകളായ മാക്ടയോടും അമ്മയോടും ആവശ്യപ്പെടാനും യോഗത്തില്‍ തീരുമാനിച്ചു.