ആരാധകര്ക്ക് കാത്തിരിപ്പ് അവസാനിപ്പിക്കാം; പുലിമുരുകന് ഒക്ടോബര് ഏഴിന് എത്തും
പുലിമുരുകന് ഉടനെത്തുന്നു.മോഹന്ലാല് നായകനായ ബ്രഹ്മാണ്ഡചിത്രം പുലിമുരുകന്റെ റിലീസിങ് തീയതി പ്രഖ്യാപിച്ചു. ചിത്രത്തിന്റെ അവസാനഘട്ട ജോലികള് പൂര്ത്തിയാക്കി ഒക്ടോബര് ഏഴിന് ചിത്രം തീയറ്ററുകളിലെത്തിക്കുമെന്ന് അണിയറ പ്രവര്ത്തകര് വ്യക്തമാക്കി. ചിത്രത്തിന്റെ ഷൂട്ടിങ് നീണ്ടതു മൂലം റിലീസിങ്ങും നീളുമെന്ന് വാര്ത്തകളുണ്ടായിരുന്നുവെങ്കിലും ആരാധകരുടെ ആകാംക്ഷക്ക് അറുതി വരുത്തി പുലുമുരുകന് എത്തുകയാണ്.
ചിത്രത്തിന്റെ സംവിധായകന് വൈശാഖ് തന്നെയാണ് റിലീസ് തീയതി വെളിപ്പെടുത്തിയത്. ചിത്രം പ്രതിസന്ധിയിലാണെന്ന വാര്ത്തകള് സംവിധായകന് തള്ളിക്കളഞ്ഞു. ചിത്രം ജൂലൈയില് റിലീസ് ചെയ്യുമെന്നും പിന്നീട് ഓണം റിലീസ് ആണെന്നുമുള്ള തരത്തില് സോഷ്യല് മീഡിയയില് പ്രചരിച്ച വാര്ത്തകള് അടിസ്ഥാനരഹിതമാണെന്ന് സംവിധായകന് പറഞ്ഞു.
മലയാളത്തിലെ ഏറ്റവുമധികം മുതല് മുടക്കുള്ള ചിത്രമെന്ന ഖ്യാതിയോടെയാണ് പുലിമുരുകന് തീയറ്ററുകളിലെത്തുന്നത്. കാടിനോട് പടവെട്ടി ജീവിക്കുന്ന മുരുകന് എന്ന കഥാപാത്രമായാണ് മോഹന്ലാല് അഭിനയിക്കുന്നത്. ഹോളിവുഡ് സ്റ്റണ്ട് മാസ്റ്റര് പീറ്റര് ഹെയ്ന് സംഘട്ടന രംഗങ്ങള് ഒരുക്കുന്നുവെന്നതാണ് ചിത്രത്തിന്റെ മറ്റെരു പ്രത്യേകത.
ചിത്രത്തിന്റെ ആദ്യ ടീസര് ആരാധകര്ക്കിടയില് തരംഗമായി മാറിയിരുന്നു. ലാല്, ജഗപതി ബാബു, മംഗല് പാണ്ഡേ, കിഷോര് എന്നിവരും ചിത്രത്തിലെ മറ്റ് പ്രധാന കഥാപാത്രങ്ങളെ അവതരിപ്പിക്കുന്നു. ഉദയകൃഷ്ണയാണ് സിനിമയ്ക്ക് തിരക്കഥ എഴുതിയിരിക്കുന്നത്. സംഗീതം ഗോപി സുന്ദര്.ചിത്രം നിര്മ്മിക്കുന്നത് ടോമിച്ചന് മുളകുപ്പാടം ആണ്.
https://www.facebook.com/Malayalivartha
