കുടുംബജീവിതത്തിലെ പ്രശ്നങ്ങള് സിനിമയെയും ബാധിച്ചു; ഒന്നിലും ശ്രദ്ധിക്കാന് കഴിഞ്ഞില്ല; വ്യക്തിജീവിതത്തെ കുറിച്ചു പ്രിയദര്ശന്
പ്രിയദര്ശന് മോഹന്ലാല് കൂട്ടുകെട്ടില് മലയാളത്തില് ഇറങ്ങിയ ചിത്രങ്ങള് മിക്കതും റെക്കോര്ഡ് ഹിറ്റുകളായിരുന്നു. എന്നാല് അടുത്തകാലത്ത് പ്രിയന്റെ ചിത്രങ്ങള് പലതും വന് പരാജയമായിരുന്നു.തന്റെ സിനിമകളെ കുടുംബജീവിതത്തിലെ പ്രശ്നങ്ങള് ബാധിച്ചിട്ടുണ്ടെന്നു സംവിധായകന് പ്രിയദര്ശന്. വ്യക്തിപരമായ കാര്യങ്ങളെക്കുറിച്ച് ഇതാദ്യമായാണു പ്രിയന് സംസാരിക്കുന്നത്.
വീട്ടില് സമാധാനമില്ലാത്ത അവസ്ഥ നമ്മുടെ ക്രിയാത്മകതയെ ബാധിക്കും. മുന്കാലത്തെ ചില ചിത്രങ്ങള് പ്രതീക്ഷിച്ചത്രയും മികവോടെ പൂര്ത്തീകരിക്കുവാന് കഴിയാത്തതിനു കാരണവും അതാണെന്നും പ്രിയദര്ശന് പറഞ്ഞു.
നടി ലിസിയും പ്രിയദര്ശനും നിയമപ്രകാരം വിവാഹമോചനം നേടിയത് 2014 ഡിസംബര് ഒന്നിനാണ്. പ്രിയദര്ശനും ലിസിയും പിരിയാനുണ്ടായ കാരണം പല രീതിയിലാണ് മാദ്ധ്യമങ്ങളില് പ്രചരിച്ചത്. എന്നാല് എന്തുകൊണ്ടാണ് താനും പ്രിയദര്ശനും പിരിഞ്ഞതെന്ന് തനിക്കും പ്രിയനും കുട്ടികള്ക്കും കോടതിക്കും അറിയാമെന്നും ലിസി പ്രതികരിച്ചിരുന്നു. തന്റെ ആത്മാഭിമാനത്തിന് മുറിവേറ്റതോടെയാണ് ബന്ധം അവസാനിപ്പിച്ചതെന്ന് ലിസി അടുത്ത സുഹൃത്തുക്കളോട് പറഞ്ഞിരുന്നു. മോഹന്ലാലും എംജി ശ്രീകുമാറും മണിയന്പിള്ള രാജുവും അടക്കമുള്ള സുഹൃത്തുക്കള് ഇരുവരെയും ഒന്നിപ്പിക്കാന് ശ്രമം നടത്തിയെങ്കിലും പരാജയപ്പെട്ടിരുന്നു.
ഒപ്പം എന്ന മോഹന്ലാല് ചിത്രത്തിന്റെ പണിപ്പുരയിലാണു പ്രിയനിപ്പോള്. ചിത്രത്തില് മോഹന്ലാല് അന്ധനായാണ് അഭിനയിക്കുന്നത്. അസാധാരണമായ ഒരു ത്രില്ലറായിരിക്കും ഇതെന്നാണ് അണിയറപ്രവര്ത്തകര് പറയുന്നത്. ഒരു കൊലപാതകക്കുറ്റം ആരോപിക്കപ്പെടുന്ന അന്ധകഥാപാത്രമായാണ് മോഹന്ലാല് ചിത്രത്തില് വേഷമിടുന്നത്. ശിക്കാര് എന്ന സൂപ്പര്ഹിറ്റിന് ശേഷം മോഹന്ലാലും സമുദ്രക്കനിയും ഒരുമിക്കുന്ന സിനിമ കൂടിയാണ് ഒപ്പം.
https://www.facebook.com/Malayalivartha
