അടുത്തിടെ ഇറങ്ങുന്ന ഹോളിവുഡ്, ബോളിവുഡ് സിനിമകള്‍ക്ക് നിലവാരമില്ലെന്ന് നടി ഹുമഖുറോഷി. അതുകൊണ്ടാണ് അവര്‍ തുടര്‍ച്ചയായി ദക്ഷിണേന്ത്യന്‍ സിനിമകള്‍ ബോളിവുഡ് റീമേക്ക് ചെയ്യുന്നതെന്നും താരം പറഞ്ഞു. മമ്മൂട്ടിയുടെ നായികയായി അഭിനയിച്ച വൈറ്റിന്റെ പ്രമോഷന ്‌വേണ്ടി കൊച്ചിയിലെത്തിയതായിരുന്നു ഹുമഖുറോഷി. സൗത്ത് ഇന്ത്യന്‍ സിനിമകളിലെ കഥയും കഥാപാത്രങ്ങളും കാമ്പുള്ളതാണ്. അതുകൊണ്ടാണ് തനിക്ക് ലഭിക്കുന്നതിന്റെ പകുതി പ്രതിഫലം പോലും കിട്ടാത്ത മലയാളത്തില്‍ അഭിനയിച്ചതെന്നും താരം പറഞ്ഞു. വാര്‍ദ്ധ്യക്യത്തില്‍ നമ്മള്‍ ചെയ്ത നല്ല സിനിമകള്‍ കണ്ട് വേണം കഴിയാന്‍. അതിനായി താരം നല്ലൊരു വീഡിയോ ലൈബ്രറിയും ഉണ്ടാക്കിയിട്ടുണ്ട്. കൊച്ചുമക്കളുമൊത്ത് നല്ല സിനിമകളും നല്ല കഥാപാത്രങ്ങളും ആസ്വദിക്കാന്‍ കഴിയണം. അതുകൊണ്ടാണ് മലയാളം ഉള്‍പ്പെടെയുള്ള സിനിമകളില്‍ അഭിനയിക്കുന്നത്.
വൈറ്റിലേക്ക് ഖുശ്ബുവാണ് ഹുമാഖുറോഷിയെ റക്കമെന്റ് ചെയ്തത്. സംവിധായകന്‍ ഉദയ് അനന്തന്‍ കഥ പറഞ്ഞപ്പോഴേ താരത്തിന് ഇഷ്ടമായി. അമിതാഭ് ബച്ചനൊപ്പം അഭിനയിക്കാനുള്ള അവസരം വരെ ഉപേക്ഷിച്ചാണ് ഹുമ ഈ സിനിമയില്‍ അഭിനയിച്ചത്. പിന്നെ മമ്മൂട്ടിയുമൊത്ത് അഭിനയിക്കുക എന്നത് ഹുമയുടെ വലിയ ആഗ്രഹമായിരുന്നു. തന്നേക്കാള്‍ ഒരുപാട് പ്രായമുള്ള ഒരാളെ പ്രണയിക്കുന്ന രോഷ്‌നി എന്ന യുവതിയുടെ വേഷമാണ് വൈറ്റില്‍. ചിത്രം ജൂലായ് 29ന് പ്രദര്‍ശനത്തിനെത്തും. സിനിമയുടെ എല്ലാ മേഖലയിലും സ്ത്രീകള്‍ കടന്നുവരുകയാണ്. അത് തന്നെ പോലുള്ളവര്‍ക്ക് വലിയ പ്രചോദനമാണ് നല്‍കുന്നതെന്നും ഹുമ ഖുറോഷി പറഞ്ഞു.
നായകന്റെ നിഴലായുള്ള, അല്ലെങ്കില്‍ ഒരേ അച്ചില്‍ വാര്‍ത്ത കഥാപാത്രങ്ങളെ അവതരിപ്പിക്കാന്‍ താല്‍പര്യമില്ലെന്നും ഹുമഖുറോഷി പറഞ്ഞു. ഏത് തരത്തിലുള്ള ക്രീയേറ്റിവിറ്റിയും ആവര്‍ത്തിച്ചാല്‍ അത് മരണത്തിന് തുല്യമാണെന്നും താരം വിശ്വസിക്കുന്നു. അഭിനേത്രിയായത് തന്നെ വ്യത്യസ്തമായ വേഷങ്ങള്‍ ചെയ്യാനാണ്. ഓരോ ദിവസവും പുതുമകള്‍ നിറഞ്ഞതാവണം. അല്ലെങ്കില്‍ മറ്റേതെങ്കിലും പ്രൊഫഷന്‍ തെരഞ്ഞെടുത്തേനെയെന്നും താരം വ്യക്തമാക്കി.