അനുരാഗ കരിക്കിന്‍ വെള്ളം എന്ന തന്റെ ആദ്യ ചിത്രത്തിലൂടെ മികച്ച നടിക്കുള്ള സംസ്ഥാന പുരസ്‌കാരം നേടിയ രജിഷ വിജയന്റെ പുതിയ ചിത്രമാണ് 'ജൂണ്‍'. ചിത്രത്തില്‍ തികച്ചും വ്യത്യസ്തമായ വേഷത്തിലാണ് രജീഷ എത്തുന്നത്. അഹമ്മദ് കബീര്‍ സംവിധാനം ചെയ്യുന്ന ചിത്രത്തില്‍ ആറ് ഗെറ്റ് അപ്പുകളില്‍ ആണ് നടി എത്തുന്നത്. ചിത്രത്തിന്റെ ഫസ്റ്റ് ലുക്ക് കഴിഞ്ഞ ദിവസം പുറത്ത് വന്നതോടെ നടിയുടെ ലുക്ക് കണ്ട് ആരാധകര്‍ ഞെട്ടി.

ചിത്രത്തിനായി തന്റെ നീളൻ മുടി വെട്ടി തൊളോപ്പമാക്കിയിരിക്കുകയാണ് നടി. ജൂണിന് വേണ്ടി രജിഷക്ക് ഒരുപാട് ബുദ്ധിമുട്ടുകള്‍ നേരിടേണ്ടി വന്നെന്നും മുടി മുറിച്ചതിന് പുറമെ താരം സിനിമയ്ക്കായി ഒന്‍പത് കിലോയോളം ഭാരം കുറച്ചെന്നും ചിത്രത്തിന്റെ നിര്‍മ്മാതാവ് വിജയ് ബാബു പറയുന്നു.

'ഈ സിനിമയുടെ തിരക്കഥ കേട്ടപ്പോള്‍ മറ്റൊന്നും ചിന്തിക്കാതെ ഓക്കെ പറയുകയായിരുന്നു. ചെയ്യണമെന്ന് ഒരുപാട് ആഗ്രഹിച്ച സിനിമയാണ് ജൂണ്‍.'രജിഷ പറയുന്നു. 'എനിക്ക് ഏറ്റവും ഇഷ്ടമുള്ളതായിരുന്നു മുടി. മുറിക്കില്ലെന്നു ഞാന്‍ നിര്‍ബന്ധം പിടിച്ചു. പിന്നെ വിജയ് സാര്‍ ആണ് പറഞ്ഞു മനസ്സിലാക്കിയത്. സത്യത്തില്‍ മുടി മുറിച്ചപ്പോഴാണ് ആ കഥാപാത്രത്തിന് കൂടുതല്‍ സത്യസന്ധത വന്നതെന്ന് തോന്നി. മുടി മുറിക്കുന്ന സമയത്ത് കുറച്ച്‌ വിഷമം ഉണ്ടായിരുന്നു.'രജിഷ പറഞ്ഞു.

'ജൂണ്‍ എന്ന പെണ്‍കുട്ടിയുടെ പതിനേഴുവയസ്സു മുതല്‍ 25 വയസ്സു വരെയുള്ള യാത്രയാണ് ഈ സിനിമ. ഈ കഥാപാത്രം ചെയ്യുന്ന നായികയ്ക്ക് രണ്ട് ലുക്കും ആവശ്യമാണ്. അതിന് ഏറ്റവും അനുയോജ്യമായി തോന്നിയത് രജിഷയെ ആയിരുന്നെന്ന് നിര്‍മ്മാതാവ് വിജയ് ബാബു പറയുന്നു. ചിത്രം 2019 ഫെബ്രുവരിയില്‍ തിയേറ്ററുകളിലെത്തും.ചിത്രം എല്ലാ പെണ്‍കുട്ടികള്‍ക്കും വേണ്ടി സമര്‍പ്പിക്കുന്നുവെന്ന് വിജയ് ബാബു ഫേസ്‌ബുക്കില്‍ പോസ്റ്റര്‍ റിലിസ് ചെയ്തുകൊണ്ട് കുറിച്ചിരിക്കുന്നത്.

അനുരാഗ കരിക്കിന്‍വെള്ളം എന്ന ആദ്യ ചിത്രത്തിലൂടെ മലയാളത്തില്‍ താരം ശ്രദ്ധിക്കപ്പെട്ടെങ്കിലും പിന്നെ രജീഷ അഭിനയിച്ച ഒരു സിനിമയും സാമ്പത്തിക ലാഭം നേടാതെ പോയിരുന്നു. ഇതിനിടയിൽ നിശ്ചയിച്ചുറപ്പിച്ച വിവാഹത്തില്‍നിന്ന് താരം പിന്മാറിയതായി ആരോപിച്ച്‌ കാമുകന്‍ രംഗത്തെത്തിയത് ആരാധകരിൽ സ്വീകാര്യത കുറച്ചു. 2016ലെ സംസ്ഥാന ചലച്ചിത്രാ പുരസ്‌കാര ജേതാവ് കൂടിയായ താരവും കോഴിക്കോട് സ്വദേശിയും സ്റ്റീല്‍ അതോറ്റി ഓഫ് ഇന്ത്യയില്‍ ജോലിക്കാരനുമായ അശ്വിന്‍ മേനോനുമായുള്ള വിവാഹ നിശ്ചയം 2016 ജൂണില്‍ നടന്നിരുന്നു.

എന്നാല്‍ സിനിമയില്‍ തിരക്കേറിയ താരമായതോടെ നിശ്ചയിച്ച വിവാഹത്തില്‍നിന്ന് നടി പിന്മാറിയെന്നായിരുന്നു ആരോപണം. രണ്ടുവര്‍ഷത്തെ പ്രണയത്തിനൊടുവിലാണ് അശ്വിനും റജീഷയും തമ്മിലുള്ള വിവാഹം ഉറപ്പിച്ചത്. കോഴിക്കോട്ടെ സ്വകാര്യ റിസോര്‍ട്ടില്‍ വച്ചായിരുന്നു രജിഷ വിജയന്റെയും അശ്വിന്‍ മേനോന്റേയും വിവാഹ നിശ്ചയം നടന്നത്. സ്റ്റീല്‍ അഥോറിറ്റി ഓഫ് ഇന്ത്യയിലെ ഉന്നത ഉദ്യോഗസ്ഥനാണ് അശ്വിന്‍. അടുത്ത ബന്ധുക്കള്‍ ഉള്‍പ്പടെ മുപ്പതോളം പേര്‍ പങ്കെടുത്തിരുന്നു. വിവാഹം വേണ്ടെന്നുവച്ചതിനു പിന്നില്‍ നടിയുടെ തീരുമാനമാണെന്നാണ് സൂചന.

പുരസ്‌കാരം ലഭിച്ച സാഹചര്യത്തില്‍ വിവാഹിതയായാല്‍ സിനിമയിലെ മികച്ച അവസരങ്ങള്‍ നഷ്ടമാകുമെന്ന് ഭയന്നാണ് രജിഷ വിവാഹത്തില്‍നിന്ന് പിന്മാറിയതെന്ന രീതിലായിരുന്നു വാർത്തകൾ പ്രചരിച്ചിരുന്നത്. പക്ഷെ താരം ഇതിനെതിരെ പ്രതികരിക്കാൻ തയ്യാറായിരുന്നില്ല. അവതാരികയായി എത്തി നടിയായി മാറിയ രജിഷയ്ക്ക് അവസരങ്ങൾ കുറഞ്ഞെങ്കിലും ഈ ചിത്രം നല്ലൊരു കഥാപാത്രത്തെയാകും ആരാധകർക്ക് നൽകുന്നതെന്ന് താരവും വ്യക്തമാക്കുന്നു.