ജോലിക്ക് പോകുന്ന ഓരോ സ്ത്രീകളും അവരുടെ പ്രൊഫഷനില്‍ മുന്നേറുകയാണ്, അപ്പോള്‍ വിവാഹ ശേഷം സ്ത്രീകള്‍ അഭിനയിച്ചാല്‍ മാനം ഇടിഞ്ഞ് വീഴുമോ നടി പ്രിയാമണി ചോദിക്കുന്നു. താമസിക്കാതെ താരം വിവാഹിതയാവാന്‍ പോവുകയാണ്. വിവാഹ ശേഷമാണ് ഇന്ന് പല നടിമാരും കരിയറില്‍ മുന്നേറുന്നത്. കരീന കപൂര്‍, വിദ്യാബാലന്‍, ജ്യോതിക, മഞ്ജുവാര്യര്‍, കാവ്യാമാധവന്‍ അങ്ങനെ നിരവധി പേരെ ഉദാഹരണമായി പ്രിയാമണി ചൂണ്ടിക്കാട്ടുന്നു.
വിവാഹ ശേഷം കുടുംബത്തില്‍ കിടന്ന് ശ്വാസം മുട്ടുന്നത് പണ്ടത്തെ കാലമാണ്. അതേസമയം കുടുംബവും കുഞ്ഞുങ്ങളെയും ശ്രദ്ധിച്ച് അഭിനയത്തില്‍ മുന്നേറാനാകുമെന്ന് പ്രിയമണി വാദിക്കുന്നു. സമൂഹത്തിന്റെ പേര് പറഞ്ഞ് നടിമാരുടെ സ്വപ്‌നങ്ങളെയും കരിയറിനെയും നശിപ്പിക്കുന്നത് ശരിയല്ലെന്നും താരം പറഞ്ഞു. വിവാഹ ശേഷം ഭര്‍ത്താവിനെയും കുടുംബത്തെയും മാത്രം ശ്രദ്ധിക്കണമെന്നത് ജാംബവാന്റെ കാലത്തെ നടപടിയാണ്. നടി ഒരുപാട് കാര്യങ്ങളില്‍ ശ്രദ്ധിക്കേണ്ടതുണ്ട്. ശരീരം, സൗന്ദര്യം, പിന്നെ ചിത്രീകരണത്തിനായി വിദേശത്തും മറ്റും പോകേണ്ടി വരും. ആണുങ്ങള്‍ ഇതൊക്കെ ചെയ്യുമ്പോള്‍ പ്രശ്‌നമല്ലതാനും.
നടിമാരെ പാചകം ചെയ്യാനും തുണികഴുകാനും സുഖിക്കാനുമുള്ള യന്ത്രങ്ങളായി ഭര്‍ത്താക്കന്‍മാര്‍ കാണുന്നത് ശരിയല്ല. അതുകൊണ്ട് നടിമാര്‍ വിവാഹത്തെ കുറിച്ചുള്ള ചിന്ത ഉപേക്ഷിച്ച് തൊഴിലില്‍ ശ്രദ്ധിക്കുന്നതാണ് നല്ലത്. ഭാര്യമാര്‍ അടിമകളാണെന്ന് ആരെങ്കിലും കരുതുന്നുണ്ടെങ്കില്‍ അവര്‍ ഒരു പട്ടിക്കുട്ടിയെ എടുത്ത് വളര്‍ത്തട്ടെ എന്നും പ്രിയാമണി ഉപദേശിക്കുന്നു.