ചെറുപ്പം മുതല്‍ മാതാപിതാക്കളോടൊപ്പം ഒരുപാട് സ്ഥലങ്ങളില്‍ കാജല്‍ അഗര്‍വാള്‍ സന്ദര്‍ശിച്ചിട്ടുണ്ട്, പക്ഷെ, ഏറ്റവും ഇഷ്ടപ്പെട്ട സ്ഥലം കേരളമാണ്. നടിയായ ശേഷമാണ് കേരളം സന്ദര്‍ശിക്കാന്‍ ഭാഗ്യം ലഭിച്ചത്. കേരളം കഴിഞ്ഞാല്‍ ഗോവയാണ് ഇഷ്ടം. ഷൂട്ടിംഗിനായി വിദേശങ്ങളില്‍ പോകുമ്പോള്‍ സ്ഥലങ്ങള്‍ കാണാനോ, അവിടുത്തെ കാര്യങ്ങള്‍ മനസിലാക്കാനോ സമയം കിട്ടാറില്ല. അതുകൊണ്ട് തിരക്കൊഴിയുമ്പോള്‍ ഒറ്റക്ക് യാത്ര നടത്തുകയാണ് പതിവ്. അത്തരം യാത്രകളിലാണ് ഇഷ്ടമുള്ള സ്ഥലങ്ങളും പ്രകൃതി ഭംഗിയും ആസ്വദിക്കുന്നത്. പരീസ് യാത്രയും താരത്തിന് പ്രിയമാണ്. അവിടുത്തെ സന്ദര്‍ശനം കഴിഞ്ഞാല്‍ മനസിലെ ഭാരമെല്ലാം ഒഴിയും.
ശ്രുതി ഹാസന്‍ പോകാത്ത രാജ്യങ്ങളില്ല, കാണാത്ത കാഴ്ചകളില്ല. ബാല്യം മുതലുള്ള വിദേശയാത്രകള്‍ താരത്തിന് അത്ഭുതമാണ്. ആ യാത്രകളില്‍ കിട്ടുന്ന സന്തോഷം വേറെ തന്നെ. നടിയായ ശേഷം യാത്രകളുടെ എണ്ണവും ദൈര്‍ഘ്യവും കൂടി. ഈ യാത്രകളിലെല്ലാം പല സ്ഥലങ്ങളും ചുറ്റിക്കറങ്ങാന്‍ പരമാവധി ശ്രമിക്കാറുണ്ട്. പാരീസ്, ബാങ്കോക്ക്, കാലിഫോര്‍ണിയ എന്നിവിടങ്ങള്‍ ശ്രുതിക്ക് ഏറെ ഇഷ്ടമാണ്. അവിടങ്ങള്‍ സന്ദര്‍ശിക്കുമ്പോള്‍ ഏറെ സന്തോഷം ലഭിക്കുന്നു. എന്നാല്‍ മനസ് ഏറ്റവും ശാന്തമാകുന്നത് ചെന്നൈയിലെ മറീനാ ബീച്ചിലെത്തുമ്പോഴാണ്.
വിദേശങ്ങളിലാണ് തെന്നിന്ത്യയിലെ പ്രമുഖ നടിമാരെല്ലാം ഒഴിവ് ദിനം ചെലവഴിക്കുന്നത്. അവിടെ വൈവിധ്യമാര്‍ന്ന ഭക്ഷണം കഴിക്കുക, ഷോപ്പിംഗിന് പോവുക, തങ്ങളെ അറിയാത്ത അന്യനാട്ടുകാര്‍ക്കൊപ്പം ചുറ്റിത്തിരിയുക ഇവയാണ് പ്രധാന വിനോദം. കാമുകന്‍മാരുമൊത്ത് കറങ്ങുന്ന നടിമാരും കുറവല്ല. പഞ്ചനക്ഷത്രഹോട്ടലുകളിലും ദ്വീപുകളിലെ കുടിലുകളിലുമെല്ലാം സുഖവാസം കഴിഞ്ഞ് അടുത്ത ലൊക്കേഷനിലേക്ക് പറക്കുന്നവരാണ് ഇക്കൂട്ടര്‍. എന്നാല്‍ ഒറ്റക്ക് സഞ്ചരിക്കുന്ന താരങ്ങളുമുണ്ട്. അക്കൂട്ടത്തിലാണ് കാജല്‍ അഗര്‍വാളും ശ്രുതിഹാസനും.