ഡാന്‍സില്‍ മകന്റെ അച്ഛന്‍ തന്നെ. അസാധരണ നൃത്തച്ചുവടുകള്‍ കാഴ്ചവെച്ച് ആരാധകരെ വിസ്മയിച്ച നടനാണ് പ്രഭുദേവ. നൃത്തത്തിലെ അതിവേഗതയും അസാധരണ ചുവടുകളും കൊണ്ട് അമ്പരപ്പിച്ച പ്രഭുവേദയ്ക്ക് 'ഇന്ത്യ മൈക്കല്‍ ജാക്‌സണ്‍' എന്ന വിളിപേര് ലഭിച്ചതില്‍ അത്ഭുതമില്ല. അച്ഛനില്‍ നിന്നു പാരമ്പര്യമായി കിട്ടിയതാണീ പ്രതിഭ എന്ന് തെളിയിക്കുന്നതാണ് ഇരുവരും ഒരുമിച്ച നൃത്ത ചുവടുകള്‍.
ഇരുവരും ഒന്നിച്ചു നിന്ന് നൃത്തം വച്ച കാഴ്ച പ്രഭുദേവയുടെ നൃത്ത വിസ്മയത്തെക്കാള്‍ ഹരം പകരുന്നതായി മാറി. പ്രഭുദേവയും അച്ഛനും കൊറിയോഗ്രാഫറുമായ മുഗുര്‍ സുന്ദരവും ഒരുമിച്ച് നൃത്തം വയ്ക്കുന്ന വീഡിയോ സോഷ്യല്‍ മീഡിയകളില്‍ തരംഗമാവുകയാണ്.
ഒരു ടിവി ചാനലിന്റെ ഡാന്‍സ് റിയാലിറ്റി ഷോയാണ് ഇരുവരുടെ അസുലഭ ഒത്തുചേരലിന് സാക്ഷിയായത്. പ്രഭുദേവയും അച്ഛനും അമ്മയും ഗസ്റ്റായി റിയാലിറ്റി ഷോയില്‍, ആദ്യകാല ഡാന്‍സ് ഓര്‍മ്മകള്‍ പങ്ക് വെച്ചമ്പോള്‍ ഈ നിമിഷം കൂടുതല്‍ വൈകാരികവും ഹൃദയം കവരുന്നതുമായി മാറി. വര്‍ത്തമാനങ്ങള്‍ക്ക് ഒടുവില്‍ എല്ലാവരുടെയും അഭ്യര്‍ഥന മാനിച്ച് ചന്ദാ രേ ചന്ദാ രേ എന്ന പാട്ടിനൊപ്പം ആദ്യം മുഗുര്‍ സുന്ദര്‍ നൃത്തം ആരംഭിച്ചു.
പ്രായത്തെ കവച്ചുവയ്ക്കുന്ന ഊര്‍ജത്തോടെയുള്ള ചലനങ്ങള്‍ കൊണ്ട് സദസിനെ അമ്പരപ്പിച്ചു മുഗുര്‍. പിന്നാലെ മകന്റെ കൈപിടിച്ച് അടിപൊളി പാട്ടുകള്‍ക്കുമൊപ്പവും ചുവട് വെച്ചപ്പോള്‍ ആരാണ് കേമന്‍ എന്ന് പറയാന്‍ കഴിയാത്ത അവസ്ഥ. 10000ലേറെ തെന്നിന്ത്യന്‍ സിനിമകള്‍ക്ക് കൊറിയോഗ്രഫി ചെയ്തിട്ടുണ്ട് മുഗുര്‍ സുന്ദര്‍.