യുഎസ് നാവിക സേനയിലെ പൈലറ്റുമാര്‍ 2004- ലും 2015-ലും പറക്കലിനിടെ കണ്ട തിരിച്ചറിയാന്‍ സാധിക്കാത്ത ചില ബഹിരാകാശ വസ്തുക്കളുടെ ദൃശ്യങ്ങളുടെ 3 വിഡിയോകള്‍ ഇന്നലെ പെന്റഗണ്‍ പുറത്തുവിട്ടു. ഇത് അന്യഗ്രഹ ജീവികളെക്കുറിച്ചുള്ള ചര്‍ച്ച വീണ്ടും സജീവമാക്കി.

പസിഫിക് സമുദ്രത്തിനു മുകളില്‍ വര്‍ത്തുളാകൃതിയിലുള്ള വസ്തു പറന്നുനില്‍ക്കുന്നതിന്റെ അവ്യക്തചിത്രമാണ് 2004-ലുള്ള വിഡിയോയില്‍ ഉള്ളത്. ഇതു പിന്നീട് അതിവേഗം ഉയരുന്നതും കാണാം. ് സംഭവത്തിനു ദൃക്‌സാക്ഷിയായ കമാന്‍ഡര്‍ ഡേവിഡ് ഫ്രേവര്‍ പറഞ്ഞത് ഒരു വസ്തു ഇത്ര വേഗത്തില്‍ ചലിക്കുന്നതു താന്‍ കണ്ടിട്ടില്ലെന്നാണ്.

ആകാശത്ത് അതിവേഗം സഞ്ചരിക്കുന്ന ചില വസ്തുക്കളും ഇതിലൊരെണ്ണം വട്ടംകറങ്ങുന്നതായുമാണ് 2015-ലെ വിഡിയോകളില്‍ കാണുന്നത്. ഈ വിഡിയോകള്‍ ചില സ്ഥാപനങ്ങള്‍ നേരത്തേ പുറത്തുവിട്ടിരുന്നു.തുടര്‍ന്ന് ഇവ അന്യഗ്രഹ ജീവികളുടെ വാഹനങ്ങളാണെന്ന് (യുഎഫ്ഒ) ഒരു കൂട്ടരും മറിച്ച് വ്യാജദൃശ്യങ്ങളാണെന്നു വേറൊരു കൂട്ടരും വാദിച്ചു.പെന്റഗണിന്റെ വെളിപ്പെടുത്തലോടെ വിഡിയോ സത്യമെന്നു തെളിഞ്ഞിരിക്കുകയാണ്. എന്നാല്‍ ഇവ അന്യഗ്രഹ വാഹനങ്ങളാണോയെന്ന സംശയം ബാക്കിയാണ്.