ചൈനയ്ക്ക് അമേരിക്കയുടെ അന്ത്യശാസനം; മാധ്യമപ്രവര്ത്തകരുടെ കാര്യത്തില് ചൈന ഇടപെടരുതെന്ന് അമേരിക്കയുടെ മുന്നറിയിപ്പ്
മാധ്യമപ്രവര്ത്തകരുടെ കാര്യത്തില് ചൈന ഇടപെടരുതെന്ന് അമേരിക്കയുടെ മുന്നറിയിപ്പ്. അമേരിക്കന് മാധ്യമപ്രവര്ത്തകരുടെ കാര്യത്തില് ഇടപെടരുതെന്ന് ചൈനക്ക് മുന്നറിയിപ്പ് നല്കിയിരിക്കുകയാണ് അമേരിക്ക. ചൈനയിലെ ഹോംഗോങ്ങില് ജോലിചെയ്യുന്ന അമേരിക്കന് മാധ്യമപ്രവര്ത്തകരുടെ കാര്യത്തില് ചൈന ഒരുതരത്തിലും ഇടപെടാന് പാടില്ലെന്നാണ് അമേരിക്ക ചൈനയോട് ആവശ്യപ്പെട്ടിരിക്കുന്നത്.
മാധ്യമപ്രവര്ത്തകരുടെ പേരില് ഇരുരാജ്യങ്ങളും തമ്മില് പ്രശ്നങ്ങള് നിലനില്ക്കേയാണ് ഞായാറാഴ്ച പുതിയ താക്കീതുമായി അമേരിക്ക എത്തിയത്. നേരത്തെ അമേരിക്കയിലെ ചൈനീസ് മാധ്യമപ്രവര്ത്തകയുടെ ചോദ്യത്തില് ക്ഷുഭിതനായി യു.എസ്. പ്രസിഡന്റ് ഡൊണാള്ഡ് ട്രംപ് വാര്ത്താസമ്മേളനം അവസാനിപ്പിച്ചത് വലിയ വാര്ത്തയായിരുന്നു. അരോചകമായ ചോദ്യം ചോദിക്കുന്ന എല്ലാവരോടും തന്റെ മറുപടി ഇതായിരിക്കുമെന്നാണ് ട്രംപ് അന്ന് പ്രതികരിച്ചത്. ഈ സമയം മറ്റൊരു മാധ്യമപ്രവര്ത്തക ചോദ്യംചോദിക്കാന് തുടങ്ങിയെങ്കിലും ട്രംപ് സമ്മേളനം അവസാനിപ്പിച്ചുമടങ്ങി.
ഇതിനിടയിലാണ് സ്വന്തം മാധ്യമപ്രവര്ത്തകരുടെ കാര്യത്തില് അമേരിക്കന് നിലപാട് ചൈനയോടായി വന്നിരിക്കുന്നത്.
ഹോംഗോങ്ങില് പ്രവര്ത്തിക്കുന്ന അമേരിക്കന് മാധ്യമപ്രവര്ത്തകര്ക്കു നേരെ ചൈന വെല്ലുവിളി വലിയ ചര്ച്ചയായി മാറിയിരിക്കുകയാണ്. മാധ്യമപ്രവര്ത്തകര് ഫ്രീ പ്രസ് അംഗങ്ങളാണ്, അല്ലാതെ പ്രചാരണ സംഘമല്ല എന്ന ഉഗ്രശാസനമാണ് യു,എസ് സ്റ്റേറ്റ് സെക്രട്ടറി മൈക്ക് പോംപിയോ ചൈനയ്ക്ക് നല്കിയിരിക്കുന്നത്. വംശീയമായ ലേഖനം കൊടുത്തെന്നാരോപിച്ച് വാള് സ്ട്രീറ്റ് ജേര്ണലിലെ മാധ്യമപ്രവര്ത്തകരെ ചൈന പുറത്താക്കിയിരുന്നു. ഇതിനുപിന്നാലെ ചൈനീസ് മാധ്യമപ്രവര്ത്തകര്ക്ക് അമേരിക്കയിലേക്കുള്ള പ്രവേശനത്തിന് കടുത്ത നിയന്ത്രണങ്ങള് അമേരിക്ക ഏര്പ്പെടുത്തുകയും ചെയ്തു. ഇരു രാജ്യങ്ങള്ക്കിടയിലും പലവിഷയങ്ങളിലും അഭിപ്രായവ്യത്യാസങ്ങള് നിലനില്ക്കുന്നുണ്ട്. ചൈനയുമായുള്ള വ്യാപാര കരാറിനെക്കുറിച്ച് പുനരാലോചിക്കാന് താന് തയ്യാറല്ലെന്ന് അമേരിക്കന് പ്രസിഡന്റ് ഡൊണാള്ഡ് ട്രംപ് പറഞ്ഞിരുന്നു. ഇതിന് പിന്നാലെയാണ് ചൈനയ്ക്കെതിരെ പുതിയ നിലപാടുമായി പോംപിയോയും വന്നത്. ലോകവ്യാപകമായി പടര്ന്നു പിടിച്ചുകൊണ്ടിരിക്കുന്ന കൊവിഡിന്റെ പേരിലും ഇരുരാജ്യങ്ങളും തര്ക്കിച്ചിരുന്നു. കൊവിഡിന് പിന്നില് ചൈനയാണെന്ന വാദം ട്രംപ് നിരന്തരം മുന്നോട്ട് വെച്ചിരുന്നു. അതേസമയം, കൊവിഡിനെ നേരിടുന്നതില് അമേരിക്കയുടെ ഭാഗത്തുനിന്ന് ഗുരുതര വീഴ്ച സംഭവിച്ചിട്ടുണ്ടെന്ന് ചൈന പറഞ്ഞിരുന്നു. അമേരിക്കയെ രൂക്ഷമായി പരിഹസിച്ചുകൊണ്ട് ചൈന വണ്സ് അപ്പോണ് എ വൈറസ് എന്ന അനിമേഷന് വീഡിയോ ഇറക്കിയിരുന്നു. ഇതിന് പിന്നാലെയാണ് പുതിയ നീക്കങ്ങള്.
https://www.facebook.com/Malayalivartha
