ക്രിസ്പര് കാസ് 9 ജീനോം എഡിറ്റിങ് സാങ്കേതികവിദ്യ ഉപയോഗിച്ച് കാന്സര് കോശങ്ങളെ നശിപ്പിക്കാനാകുമെന്ന് പഠനം
ഇസ്രയേലിലെ ടെല് അവീവ് സര്വകലാശാലയിലെ ഗവേഷകന് പ്രഫ. ഡാന് പിയറിന്റെ നേതൃത്വത്തില് രാജ്യാന്തര സംഘം നടത്തിയ പഠനം ആരോഗ്യരംഗത്തെ ഭാവി പ്രതീക്ഷയായ ക്രിസ്പര് കാസ് 9 ജീനോം എഡിറ്റിങ് സാങ്കേതികവിദ്യ ഉപയോഗിച്ച് കാന്സര് കോശങ്ങളെ നശിപ്പിക്കാനാകുമെന്ന് കണ്ടെത്തി. ചികിത്സിച്ചു മാറ്റാന് ബുദ്ധിമുട്ടുള്ള മസ്തിഷ്ക കാന്സര്, അണ്ഡാശയ കാന്സര് എന്നിവ ഭേദമാക്കുന്നതില് പുതിയ കണ്ടെത്തല് വന് മുന്നേറ്റത്തിനു വഴിതെളിക്കും.
പ്രത്യേക നാനോ പദാര്ഥങ്ങളുള്ള ഒരു തന്മാത്ര എലികളുടെ കോശങ്ങളില് കടത്തിവിട്ട് കാന്സര് കോശങ്ങളെ മാത്രം കണ്ടെത്തി, ക്രിസ്പര് കാസ് 9 സാങ്കേതികവിദ്യയിലൂടെ ഇവയുടെ ജനിതകഘടനയില് മാറ്റം വരുത്തിയായിരുന്നു പരീക്ഷണം. ഒറ്റത്തവണ ചികിത്സയില് തന്നെ മസ്തിഷ്ക കാന്സര് ബാധിച്ചവരുടെ അതിജീവനശേഷി 30% കൂടിയെന്നാണു പഠനം. അണ്ഡാശയ കാന്സര് ബാധിച്ചവരില് 80 ശതമാനവും.
പാര്ശ്വഫലങ്ങളില്ല എന്നതും ഒരിക്കല് ജീനോം എഡിറ്റിങ്ങിലൂടെ സുഖപ്പെടുത്തിയ കാന്സര് വീണ്ടും വരില്ലെന്നതും ഇതിന്റെ സവിശേഷതയാണ്.
കൃത്യതയോടെ ജനിതകഘടനയില് (ഡിഎന്എ) മാറ്റങ്ങള് വരുത്തുന്ന സാങ്കേതിക വിദ്യയാണ് ക്രിസ്പര് കാസ് 9 ജീനോം എഡിറ്റിങ്. ഒരു ഗൈഡ് ആര്എന്എ തന്മാത്ര ഡിഎന്എയില് എവിടെ മുറിക്കണമെന്നു മനസ്സിലാക്കി അങ്ങോട്ടേക്കു കാസ് 9 എന്ന മറ്റൊരു തന്മാത്രയെ നയിക്കും. കാസ് 9 കൃത്യസ്ഥാനത്തു തന്നെ മുറിക്കും.
ക്രിസ്പര് കാസ് 9 സാങ്കേതികവിദ്യയുടെ തുടക്കക്കാര് രസതന്ത്രത്തിലെ ഈ വര്ഷത്തെ നൊബേല് പുരസ്കാരം നേടിയ ഇമ്മാനുവല് ഷാപെന്റിയര്, ജെന്നിഫര് ഡോഡ്ന എന്നിവരാണ്. എയ്ഡ്സിനും ചില അപൂര്വ ജനിതകരോഗങ്ങള്ക്കുമുള്ള ചികിത്സയില് പുതിയ കണ്ടെത്തല് സഹായകമായേക്കും.
https://www.facebook.com/Malayalivartha
