യുകെയിലെ ഒരു ജയില്‍ ഉദ്യോഗസ്ഥയാണ് കുറ്റവാളിയുമായുള്ള പ്രണയബന്ധത്തെ തുടര്‍ന്ന് 10 മാസത്തേക്ക് ജയിലിലടയ്ക്കപ്പെട്ടത്.യുകെയിലെ സട്ടണിലെ സുരക്ഷാ ജയിലിലെ ജീവനക്കാരിയാണ് 22 കാരിയായ സ്‌കാര്‍ലറ്റ് ആല്‍ഡ്രിച്ച്. ജയിലില്‍ ജോലിയില്‍ പ്രവേശിച്ച ശേഷമാണ് ജയില്‍ അന്തേവാസിയായ ജോണ്‍സ് എന്നയാളുമായി പ്രണയ ബന്ധത്തിലാകുന്നത്. ഇതിന് തുടര്‍ന്ന് ആല്‍ഡ്രിച്ച് കാമുകനുമായി സംസാരിക്കാനായി ഒരു മൊബൈല്‍ ഫോണും സിം കാര്‍ഡും ആരുമറിയാതെ ജോണ്‍സിന് എത്തിച്ച് നല്‍കിയിരുന്നു. എന്നാല്‍ മറ്റ് ഉദ്യോഗസ്ഥര്‍ നടത്തിയ പരിശോധനയ്ക്കിടെ ജോണ്‍സിന്റെ ഫോണും ഫോണില്‍ നിന്ന് പ്രണയ സന്ദേശങ്ങളും കണ്ടെത്തി. ജോണ്‍സിന്റെ ഫോണ്‍ നമ്ബര്‍ അടങ്ങിയ ടാറ്റൂ പതിച്ച കാലുകളുടെ ചിത്രവും ഫോണില്‍ നിന്ന് കണ്ടെത്തി. പിന്നീട്, ആല്‍ഡ്രിച്ചിന്റെ ശരീരം പരിശോധിച്ച ഒരു നഴ്‌സ് അവരുടെ ഇടത് തുടയുടെ മുകളില്‍ പച്ചകുത്തിയതായി റിപ്പോര്‍ട്ട് ചെയ്തു.

കോടതിയില്‍ വാദം കേള്‍ക്കുന്നതിനിടെ ആല്‍ഡ്രിച്ച് കുറ്റം സമ്മതിച്ചു. ഇതിനെ തുടര്‍ന്ന് ആല്‍ഡ്രിച്ചിനെ 10 മാസത്തേയ്ക്ക് ജയിലില്‍ അടച്ചു. ഹള്‍ ക്രൗണ്‍ കോടതിയില്‍ കേസ് പരിഗണിച്ച ജഡ്ജി ജോണ്‍ താക്കറെ ക്യുസി ആല്‍ഡ്രിച്ചിന്റെ പ്രവര്‍ത്തനങ്ങള്‍ 'ജയിലിന്റെ സുരക്ഷയ്ക്ക് തന്നെ ഭീഷണിയായെന്ന് വ്യക്തമാക്കി. മൊബൈല്‍ ഫോണുകള്‍ ജയില്‍ ജീവിതത്തെ തടസ്സപ്പെടുത്തുമെന്നും അദ്ദേഹം പറഞ്ഞു. അന്തേവാസികളുമായി അടുത്ത ബന്ധം വളര്‍ത്തിയെടുക്കുന്നതിലെ അപകടങ്ങളെക്കുറിച്ച് പരിശീലനം ലഭിച്ചിട്ടുണ്ടെങ്കിലും ജയില്‍ ഉദ്യോഗസ്ഥയ്ക്ക് നിയമങ്ങള്‍ പാലിക്കാനായില്ലെന്ന് അദ്ദേഹം വ്യക്തമാക്കി.