അഫ്ഗാനിസ്താനില്‍ ഇടക്കാല സര്‍ക്കാരിനെ പ്രഖ്യാപിച്ച്‌ താലിബാന്‍. മുല്ല ഹസന്‍ അഖുന്ദ് പ്രധാനമന്ത്രിയാകും. മുല്ല ബറാദര്‍ ഒന്നാം ഉപ പ്രധാനമന്ത്രിയും മൗലവി ഹനാഫി രണ്ടാം ഉപ പ്രധാനമന്ത്രിയുമാകും. മുല്ല യാകൂബാണ് ആക്ടിങ് പ്രതിരോധ മന്ത്രി.

സിറാജുദ്ദീന്‍ ഹഖാനി ആക്ടിങ് ആഭ്യന്തര മന്ത്രിയുമാകും എന്നുമാണ് റിപ്പോർട്ട്. താലിബാന്‍ വക്താവ് സബിഹുല്ല മുജാഹെദ് ചൊവ്വാഴ്ച കാബൂളില്‍ നടത്തിയ വാര്‍ത്താസമ്മേളനത്തിലാണ് ഇക്കാര്യം അറിയിച്ചത്.

താലിബാനില്‍ ഉള്‍പോര് രൂക്ഷമായ സാഹചര്യത്തിലാണ് താരതമ്യേന സുപരിചിതനല്ലാത്ത രണ്ടാംനിര നേതാവ് പ്രധാനമന്ത്രിയായി സ്ഥാനമേല്‍ക്കുന്നത്. താലിബാന്റെ നയരൂപീകരണ സമിതിയായ റെഹ്ബാരി ശൂരയുടെ അധ്യക്ഷനാണ് ഹസന്‍ അഖുന്‍ദ്.

പഴയ താലിബാന്‍ സര്‍ക്കാരില്‍ വിദേശകാര്യ മന്ത്രിയായിരുന്നു ഹസന്‍ അഖുന്‍ദ്. യുഎന്നിന്റെ ഭീകരരുടെ പട്ടികയിലും അഖുന്‍ദയുടെ പേരുണ്ട്. താലിബാന്‍ പരമോന്നത നേതാവ് ഹിബാത്തുല്ല അഖുന്‍ദസാദായാണ് ഹസന്‍ അഖുന്‍ദിന്റെ പേര് നിര്‍ദേശിച്ചതെന്നും മാധ്യമങ്ങള്‍ റിപ്പോർട്ട് ചെയ്യുന്നു.

രാജ്യത്തെ സ്ഥിരപ്പെടുത്താനും ആഭ്യന്തരയുദ്ധത്തിലേക്കുള്ള തിരിച്ചുവരവ് തടയാനും കഴിയുന്ന സ്ഥിരതയുള്ള സര്‍കാര്‍ താലിബാന്‍ രൂപീകരിക്കുമോ എന്ന് യുഎസും സഖ്യകക്ഷികളും ഉറ്റുനോക്കുകയാണ്. മറ്റ് ആവശ്യങ്ങളില്‍ അഫ്ഗാനിസ്താന്‍

വിടാന്‍ ആഗ്രഹിക്കുന്നവര്‍ക്ക് യാത്രാ സ്വാതന്ത്ര്യവും സ്ത്രീകളുടെ അവകാശങ്ങളും ഉള്‍പെടുന്നു. അഫ്ഗാനെ അടിച്ചമര്‍ത്തി താലിബാന്‍ അധികാരം പിടിച്ചെടുത്തപ്പോള്‍ കടുത്ത അടിച്ചമര്‍ത്തലാണ് നേരിട്ടത്.