ഒരു പോലെ ഇരിക്കുന്ന ഇരട്ട കുട്ടികള്‍ എന്നും ഒരു കൗതുകമാണ് അല്ലെ.. പക്ഷെ അവര്‍ക്കും എന്തെങ്കിലും ഒരു ചെറിയ വ്യത്യാസം ഉണ്ടാവും. എന്നാല്‍ അന്ന ലൂസി എന്നീ ഇരട്ടകളായ യുവതികളെ കുറിച്ച് കേട്ടിട്ടുണ്ടോ? ലോകത്തില്‍ ഏറ്റവും കൂടുതല്‍ സാമ്യമുള്ള ഇരട്ടകളാണ് ഇവര്‍ എന്നാണ് പറയപ്പെടുന്നത്. കാഴ്ചയിലും സംസാരത്തിലുമെല്ലാം ഒരു കടുക് മണിയുടെ വ്യത്യാസം പോലുമില്ലെന്നാണ് ഇവരെ കുറിച്ച് പലരും പറഞ്ഞിട്ടുള്ളത്.

മാത്രമല്ല രണ്ടുപേരും പ്രണയിക്കുന്നതും ഒരാളെയാണ്. ഇപ്പോഴിതാ ഈ സഹോദരിമാര്‍ ലോകരെ ഞെട്ടിച്ചുകൊണ്ട് മറ്റൊരു കൗതുക വാര്‍ത്ത കൂടി പുറത്തുവിട്ടിരിക്കുന്നു. അതായത്, ഇവരും തങ്ങളുടെ പങ്കാളിയായ ബെന്‍ ബൈണില്‍ നിന്ന് ഒരുമിച്ച് ഗര്‍ഭം ധരിക്കാനുള്ള തീരുമാനത്തിലാണ്.

ഓ മൈ ഗോഡ് അതെങ്ങനെ സാധിക്കും എന്നാണോ ചിന്തിക്കുന്നത്. എന്നാല്‍ അതികം തല പുകക്കേണ്ട ഐവിഎഫ് വഴി ഗര്‍ഭധാരണം നടത്താനാണ് ഇവരുടെ പദ്ധതി. 'ദിസ് മോര്‍ണിംഗ്' എന്ന ഷോയിലൂടെയാണ് അവര്‍ തങ്ങളുടെ ആഗ്രഹം വെളിപ്പെടുത്തിയത്.

എന്നാല്‍ ഇവര്‍ക്കെന്താ ഭ്രാന്തുണ്ടോ എന്നും ചിന്തിക്കുന്നവരുണ്ട്. നേരത്തെ ഒരു പങ്കാളിയെ രണ്ട് പേരും പ്രണയിക്കുന്നതും ഒരേ സമയത്ത് ഡേറ്റിംഗിന് പോകുന്നതുമെല്ലാം വിമര്‍ശനങ്ങള്‍ക്ക് വഴിയൊരുക്കിയിരുന്നു. പക്ഷേ ഞങ്ങളുടെ കാര്യത്തില്‍ അധികം വിമര്‍ശനങ്ങളൊന്നും വേണ്ട ഞങ്ങള്‍ ഇങ്ങനാണ് ഭായ് എന്ന മട്ടിലാണ് ഈ സഹോദരിമാരുടെ നടപ്പ്. 'ഞങ്ങള്‍ ഒരുമിച്ച് ഗര്‍ഭിണികളാകാന്‍ ആഗ്രഹിക്കുന്നു.

ജീവിതത്തിലെ എല്ലാം ഒരുമിച്ച് ചെയ്യാന്‍ ഞങ്ങള്‍ ആഗ്രഹിക്കുന്നു. ഞങ്ങള്‍ക്ക് ഒരുമിച്ച് പ്രായമാകും, ഒരുമിച്ച് മരിക്കുകയും ചെയ്യും' ഇരട്ടകള്‍ പറഞ്ഞു. അവര്‍ പരസ്പരം അത്രകണ്ട് ഇഷ്ടപ്പെടുന്നു. ഒരുമിച്ച് പിറന്ന് വീണ അവര്‍ തങ്ങളെ ആളുകള്‍ വേറിട്ട് കാണരുതെന്ന വാശിയില്‍ ലക്ഷക്കണക്കിന് രൂപ ചിലവഴിച്ച് ശസ്ത്രക്രിയകള്‍ നടത്തിയാണ് ഒരു അണുപോലും വ്യത്യാസമില്ലാത്ത രീതിയിലേക്ക് മാറിയത്.

അതേസമയം വിമര്‍ശിക്കുന്നവര്‍ മാത്രമല്ല കേട്ടോ ഇവരെ പിന്തുണക്കുന്നവരും ഒരുപാടാണ്. കാരണം ഒരുമിച്ച് ജനിച്ചതുമുതല്‍ എല്ലാകാര്യങ്ങളും രണ്ട് പേരും ഒന്നിച്ചാണ് ചെയ്യുന്നത്. ഇന്നുവരെ ഒരു നിമിഷം പോലും അവര്‍ പിരിഞ്ഞിരുന്നിട്ടില്ല. ആഹാരം കഴിക്കുന്നതും, ഉറങ്ങാന്‍ പോകുന്നതും എന്തിനേറെ പറയുന്നു കുളിക്കുന്നത് പോലും ഒരുമിച്ചാണ്. അങ്ങനെയുള്ളപ്പോള്‍ തങ്ങളുടെ പങ്കാളിയില്‍ നിന്ന് ഒരുമിച്ച് ഗര്‍ഭം ധരിക്കണം എന്ന് അവര്‍ ആഗ്രഹിക്കുന്നുണ്ടെങ്കില്‍ അതില്‍ തെറ്റില്ലെന്നാണ് ഇരട്ടകളുടെ ആരാധകര്‍ പറയുന്നത്.

ഓസ്‌ട്രേലിയയിലെ പെര്‍ത്തില്‍ നിന്നുള്ള ഈ സഹോദരങ്ങള്‍ 2012 മുതലാണ് കാമുകനായ ബെന്‍ ബൈണുമായി ഡേറ്റിംഗ് ആരംഭിച്ചത്. കഴിഞ്ഞ പത്ത് വര്‍ഷമായി ഇവര്‍ മൂന്ന് പേരും ഒരുമിച്ചാണ് കഴിയുന്നത്.

അതേസമയം ബെന്‍ ബൈണിന് രണ്ട് സഹോദരിമാരേയും വിവാഹം കഴിക്കണം എന്ന് ആഗ്രഹമുണ്ട്. കഴിഞ്ഞ വര്‍ഷം ഒരു റിയാലിറ്റി ഷോയില്‍ പങ്കെടുക്കവേ അദ്ദേഹം ഇക്കാര്യം പറഞ്ഞതുമാണ്. എന്നാണ് നിയമപരമായി അത് സാധിക്കില്ല. കാരണം ഓസ്‌ട്രേലിയന്‍ നിയമം അനുസരിച്ച് ബഹുഭാര്യാത്വം ക്രിമിനല്‍ക്കുറ്റമാണ്. അതുകൊണ്ട് തന്റെ കാമുകിമാരുടെ കൂടെ ലിവിംഗ് ടുഗേതര്‍ ആയി കഴിയാന്‍ തന്നെ തീരുമാനിച്ചിരിക്കുകയാണ് അദ്ദേഹം.