ഫിലിമില്‍ സാധാരണവെളിച്ചം പതിച്ചാല്‍ വൈറസുകള്‍ നശിക്കും; കോവിഡ് വൈറസുകളെ നിര്‍ജീവമാക്കാന്‍ കഴിയുന്ന പ്ലാസ്റ്റിക് ഫിലിം വികസിപ്പിച്ച് ബ്രിട്ടീഷ് ശാസ്ത്രജ്ഞര്‍, ആശുപത്രികളില്‍ ഒറ്റത്തവണ ഉപയോഗിച്ച് ഉപേക്ഷിക്കുന്ന മേശവിരിപ്പ്, കര്‍ട്ടന്‍, ജീവനക്കാരുടെ കുപ്പായം എന്നിവയില്‍ ഇതു പ്രയോഗിക്കാം...
ലോകത്തെ മുഴുവനും നടുക്കിയ കോവിഡിനു കാരണമായ സാര്‍സ്-കോവി-2 ഉള്‍പ്പെടെയുള്ള വൈറസുകളെ നിര്‍ജീവമാക്കാന്‍ കഴിയുന്ന പ്ലാസ്റ്റിക് ഫിലിം ബ്രിട്ടീഷ് ശാസ്ത്രജ്ഞര്‍ വികസിപ്പിച്ചിരിക്കുകയാണ്. ഈ ഫിലിമില്‍ സാധാരണവെളിച്ചം പതിച്ചാല്‍ വൈറസുകള്‍ നശിക്കുന്നതാണ്. ആശുപത്രികളില്‍ ഒറ്റത്തവണ ഉപയോഗിച്ച് ഉപേക്ഷിക്കുന്ന മേശവിരിപ്പ്, കര്‍ട്ടന്‍, ജീവനക്കാരുടെ കുപ്പായം എന്നിവയില്‍ ഇതു പ്രയോഗിക്കാന്‍ സാധിക്കും.
കൂടാതെ അള്‍ട്രാവയലറ്റ് വെളിച്ചം ആഗിരണംചെയ്യാന്‍ കഴിയുന്ന കണങ്ങളുടെ നേര്‍ത്ത ഒരുപാളി ഈ ഫിലിമില്‍ പൂശിയിട്ടുമുണ്ട്. വെളിച്ചം പതിക്കുമ്പോള്‍ തന്നെ അവ റിയാക്ടീവ് ഓക്‌സിജന്‍ സ്പീഷീസ് (ആര്‍.ഒ.എസ്.) ഉണ്ടാക്കും. ഓക്‌സിജനില്‍നിന്നു രൂപംകൊള്ളുന്ന വന്‍ പ്രതിപ്രവര്‍ത്തനശേഷിയുള്ള രാസവസ്തുക്കളാണ് ആര്‍.ഒ.എസ്. ഇവയാണ് വൈറസുകളെ നിര്‍ജീവമാക്കുന്നതെന്ന് ഫിലിം വികസിപ്പിച്ച ബെല്‍ഫാസ്റ്റ് ക്വീന്‍സ് സര്‍വകലാശാലയിലെ ഗവേഷകര്‍ വ്യക്തമാക്കുകയുണ്ടായി. ഈ പ്ലാസ്റ്റിക് ഫിലിം മണ്ണില്‍ അലിയുന്നതായതിനാല്‍ തന്നെ പാരിസ്ഥിതിക ദോഷമില്ലെന്നും അവര്‍ കൂട്ടിച്ചേർത്തു.
അതേസമയം രണ്ടുതരം ഇന്‍ഫ്‌ലുവന്‍സ എ വൈറസ്, ഇ.എം.സി. വൈറസ്, സാര്‍സ്-കോവി-2 വൈറസ് എന്നിവയുപയോഗിച്ച് ഈ ഫിലിമില്‍ പരീക്ഷണം നടത്തിയിരുന്നു. വൈറസ് കണങ്ങള്‍ പുരണ്ട ഫിലിം അള്‍ട്രാ വയലറ്റ് വെളിച്ചത്തിലോ ഫ്‌ലൂറസെന്റ് വിളക്കിന്റെ വെളിച്ചത്തിലോ കാണിച്ചപ്പോള്‍ തന്നെ വൈറസ് നിര്‍ജീവമാവുകയാണ് ചെയ്തത്. വൈറസ് വ്യാപനം കാര്യമായി കുറയ്ക്കാന്‍ ഈ ഫിലിമിനാകും എന്നാണ് കരുതുന്നത്. ഗവേഷണത്തിന്റെ വിശദാംശങ്ങള്‍ ജേണല്‍ ഓഫ് ഫോട്ടോെകമിസ്ട്രി ആന്‍ഡ് ഫോട്ടോബയോളജി ബി: ബയോളജി ജേണലില്‍ പ്രസിദ്ധീകരിക്കുകയുണ്ടായി.
https://www.facebook.com/Malayalivartha
