ഐഫോൺ 14 വാങ്ങാനായി ആരും വൃക്ക വിൽക്കരുതെന്ന അഭ്യർത്ഥനയുമായി തായ് റെഡ് ക്രോസ് രംഗത്ത് എത്തിയിരിക്കുകയാണ്. ഫോൺ വാങ്ങാനായി വൃക്ക വിറ്റ ആളുകളുടേതെന്ന പേരിൽ ചിത്രങ്ങൾ പ്രചരിച്ചതിനു പിന്നാലെയാണ് റെഡ് ക്രോസിൻ്റെ ഇത്തരത്തിലുള്ള അഭ്യർത്ഥന വന്നിരിക്കുന്നത്. ലാവോസിലെ ഒരു ബ്യൂട്ടി ക്ലിനിക്കിൽ, തങ്ങളുടെ ഐഫോണുകൾ പിടിച്ച് വൃക്ക മാറ്റിയതെന്ന തരത്തിൽ, വയറ്റിലുള്ള മുറിവുമായി നിൽക്കുന്ന ചിലരുടെ ചിത്രങ്ങളാണ് നിലവിൽ പുറത്തുവന്നത്.

അതോടൊപ്പം തന്നെ ഇത്തരത്തിൽ അവയവക്കൈമാറ്റം നടത്തുന്നത് നിയമലംഘനമാണെന്ന് തായ് റെഡ് ക്രോസ് അവയവക്കൈമാറ്റ വകുപ്പ് പറയുകയുണ്ടായി. അവയവക്കൈമാറ്റം ഇത്തരത്തിൽ പ്രചരിപ്പിക്കുന്നത് ശരിയല്ല. പ്രത്യേകിച്ച് ഐഫോൺ വാങ്ങാനുള്ള പണത്തിനായി അവയം നൽകുന്നത് വളരെ മോശമാണെന്നും റെഡ് ക്രോസ് ചൂണ്ടിക്കാണിച്ചു.

അതേസമയം, ഈ ചിത്രങ്ങളുടെ ആധികാരികതയെപ്പറ്റി ചില സംശയങ്ങളുയരുന്നുണ്ട്. എന്നാൽ മാർക്കറ്റിംഗ് തന്ത്രമാവാം ഇതെന്ന സംശയമാണ് പലരും പങ്കുവെക്കുന്നത്. 2020ൽ ഒരു 17കാരൻ ചൈനയിൽ തൻ്റെ വൃക്ക വിറ്റ് ഐഫോൺ വാങ്ങിയിരുന്നു. അതോടൊപ്പം തന്നെ രണ്ടാമത്തെ വൃക്കയുടെ പ്രവർത്തനം താളം തെറ്റിയതോടെ ഈ കുട്ടി കിടപ്പുരോഗിയാവുകയാണ് ചെയ്തത്.