പോളിഅമോറസ് റിലേഷന്‍ഷിപ്പിലൂടെ വാർത്തകളിൽ ഇടംനേടി വിര്‍ജീനിയയിലെ റിച്ച്മണ്ട് സ്വദേശികളായ ജെന്നിഫര്‍ മാര്‍ട്ടിന്‍-ഡാനിയേല്‍ ദമ്പതികള്‍. ജെന്നിഫറിന്റെ ഡേറ്റിങ് പങ്കാളി ആയിരുന്ന ടൈ എന്ന വ്യക്തിയാണ് ഇവരുടെ കുടുംബത്തിനൊപ്പം ചേര്‍ന്നത്. ഭാര്യാഭര്‍തൃബന്ധത്തിന് പുറമേ താത്ക്കാലിക പങ്കാളികളെ കണ്ടെത്തുന്നതിന് താത്പര്യമുണ്ടെന്ന് മനസിലാക്കിയതോടെയാണ് ജെന്നിഫറും ഡാനിയേലും ഡേറ്റിങ്ങിന് പോകാന്‍ തീരുമാനിക്കുന്നത്.

മക്കള്‍ക്ക് അഞ്ചും മൂന്നും വയസുള്ളപ്പോഴായിരുന്നു ഈ തീരുമാനം. ഇതിന് മുമ്പ് ഇതുമായി ബന്ധപ്പെട്ട പുകസ്തകങ്ങള്‍ വായിക്കുകയും കൗണ്‍സിലിങ്ങിന് പോകുകയും ചെയ്തു. ഇത്തരം കൂട്ടായ്മകളില്‍ കുട്ടികളോടൊപ്പം പങ്കെടുക്കുകയും ചെയ്തു. തങ്ങളുടെ പുതിയ ജീവിതരീതി കുട്ടികള്‍ക്ക് മനസിലാക്കി കൊടുക്കാനായിരുന്നു ഉദ്ദേശം.

അധികം വൈകാതെ ഇരുവരും പങ്കാളികളെ കണ്ടെത്തി തുടങ്ങി. ഇക്കാര്യത്തെ കുറിച്ച് കുട്ടികളോട് തുറന്ന് സംസാരിക്കുകയും ചെയ്തു. ഒരാള്‍ ഡേറ്റിങ്ങിന് പോകുമ്പോള്‍ മറ്റൊരാള്‍ കുട്ടിയോടൊപ്പം സമയം ചിലവിടുന്നതായിരുന്നു രീതി. എന്നാല്‍ 2018-ല്‍ ടൈം എന്ന വ്യക്തിയുമായി ജെന്നിഫര്‍ പരിചയപ്പെട്ടതോടെയാണ് കാര്യങ്ങള്‍ മാറിയത്.

ജെന്നിഫറും ടൈയും തമ്മിലുള്ള ബന്ധം രണ്ടു വര്‍ഷത്തോളം തുടര്‍ന്നു. ഇടയ്ക്ക് വീട്ടിലേക്ക് വരാറുള്ള ടൈ കുട്ടികളുമായും അടുത്തു. ടൈയേയും കൂടി ഒപ്പം താമസിപ്പിക്കാനുള്ള ആഗ്രഹം ജെന്നിഫര്‍ വൈകാതെ കുടുംബത്തെ അറിയിച്ചു. ഡാനിയലും മക്കളും ആ തീരുമാനത്തെ സന്തോഷത്തോടെ സ്വാഗതം ചെയ്തു.

അതിനുശേഷം മൂന്നു പേരും തങ്ങളുടെ വ്യക്തിഗത തെറാപിസ്റ്റിനെ കണ്ട് ചര്‍ച്ച നടത്തി. കുട്ടികളുടെ സുരക്ഷയേയും മാനസികാവസ്ഥയേയും ഒരു തരത്തിലും ബാധിക്കാത്ത രീതിയില്‍ ബന്ധം കൊണ്ടുപോകണം എന്നതായിരുന്നു അവര്‍ക്ക് ലഭിച്ച ഉപദേശം. തുടര്‍ന്ന് മൂന്നു പേരും കുട്ടികളുടെ രക്ഷിതാക്കള്‍ എന്ന നിലയില്‍ പ്രവര്‍ത്തിക്കണമെന്ന ധാരണയില്‍ ഒരുമിച്ച് ജീവിതം ആരംഭിക്കുകയായിരുന്നു.

2020 ൽ ഇവർ ഒരുമിച്ച് ഒരു വീട്ടിലേക്ക് മാറി. COVID-19 ലോക്ക്ഡൗൺ ആരംഭിച്ചപ്പോൾ, കുട്ടികളുമായി എല്ലായ്‌പ്പോഴും വീട്ടിലിരുന്ന് ഒരുപാട് സമയം ഒരുമിച്ച് ചിലവഴിച്ചു. ജെന്നിഫറിന്റെ പുതിയ കുടുംബത്തിന് അത് അവിശ്വസനീയമായ ഒരു ബോണ്ടിംഗ് അനുഭവമായിരുന്നു. കുട്ടികൾ ടൈയെ സ്നേഹിക്കുകയും അവരുടെ രണ്ടാമത്തെ അച്ഛൻ എന്ന് വിളിക്കുകയും ചെയ്തതായി ജെന്നിഫർ പറയുന്നു. ഇവരുടെ സുഹൃത്തുക്കളുടെയും കുടുംബാംഗങ്ങളുടെയും പിന്തുണയും അവർക്കൊപ്പമുണ്ടെന്ന് ജെന്നിഫർ പറയുന്നു.