ഏഷ്യയിലെ രണ്ടാമത്തെ വലിയ ധനികനും റിലയൻസ് ഇൻഡസ്ട്രീസ് (ആർഐഎൽ) ചെയർമാനുമായ മുകേഷ് അംബാനി സിംഗപ്പൂരിൽ ഫാമിലി ഓഫീസ് തുറക്കുന്നുവെന്ന് റിപ്പോർട്ടുകൾ. സമ്പന്നരുടെ കാര്യങ്ങൾ കൈകാര്യം ചെയ്യുന്ന സ്ഥാപനമാണ് ഫാമിലി ഓഫീസുകൾ. ഓഫീസ് ആരംഭിച്ചതിന് പുറമെ, പ്രവർത്തനങ്ങൾക്ക് മേൽനോട്ടം വഹിക്കാൻ പുതിയ മാനേജരെയും നിയോഗിച്ചു എന്നാണ് പുറത്തു വരുന്ന വാർത്തകൾ. കൂടുതൽ ജീവനക്കാരെ താമസിയാതെ റിക്രൂട്ട് ചെയ്യുകയും ഉടൻ പ്രവർത്തനം ആരംഭിക്കുകയും ചെയ്യും എന്നാണ് റിപ്പോർട്ടുകൾ.

അംബാനിമാർ മുംബൈയിൽ ഫാമിലി ഓഫീസ് സ്ഥാപിച്ചിരുന്നുവെങ്കിലും, അവരുടെ നിക്ഷേപം പ്രധാനമായും ആർ ഐ എൽ -ലേക്ക് ആയിരുന്നു. ഏറ്റെടുക്കലുകളും ഭാഗിക ഓഹരി ഇടപാടുകളും പോലും ആർ ഐ എൽ വഴിയാണ് നടത്തിയതെന്ന് ഒരു വൃത്തങ്ങൾ പറഞ്ഞു. അംബാനിയുടെ രാജ്യത്തിന് പുറത്തുള്ള ആദ്യത്തെ ഫാമിലി ഓഫീസായ സിംഗപ്പൂർ ഓഫീസ് 10-12 മാസത്തിനുള്ളിൽ പ്രവർത്തനക്ഷമമാകുമെന്ന് പ്രതീക്ഷിക്കുന്നു.

സമീപ വർഷങ്ങളിലായ് സിംഗപ്പൂരിൽ ബിസിനസ്സ് അടിത്തറ സ്ഥാപിച്ച അതി സമ്പന്നരുടെ പട്ടികയിലെ ഏറ്റവും പുതിയ വ്യക്തിയാണ് മുകേഷ് അംബാനി. 2020 നവംബറിൽ ഹെഡ്ജ് ഫണ്ട് കോടീശ്വരനായ റേ ഡാലിയോ തന്റെ ഏഷ്യൻ നിക്ഷേപങ്ങൾ കൈകാര്യം ചെയ്യുന്നതിനായി സിംഗപ്പൂരിൽ ഫാമിലി ഓഫീസ് സ്ഥാപിച്ചിരുന്നു. ഗൂഗിൾ സഹസ്ഥാപകൻ സെർജി ബ്രിൻ ഉൾപ്പെടെയുള്ള സമ്പന്നർക്ക് ഫാമിലി ഓഫീസുകൾ സ്ഥാപിക്കാൻ സിംഗപ്പൂറിന് മുൻഗണന നൽകിയിട്ടുണ്ട്.

ഏഷ്യയിലെ ഏറ്റവും മികച്ച സാമ്പത്തിക കേന്ദ്രങ്ങളിലൊന്നായി വിലയിരുത്തപ്പെടുന്ന സിംഗപ്പൂരിൽ ആഗോള ശതകോടീശ്വരന്മാരും ഉന്നത സാമ്പത്തിക ശ്രേണിയിൽപ്പെടുന്നവരും ഫാമിലി ഓഫീസുകൾ സ്ഥാപിച്ചു വരുന്നു.

സിംഗപ്പൂരിലെ ഫാമിലി ഓഫീസുകളുടെ എണ്ണം 2017-നും 2019-നും ഇടയിൽ അഞ്ചിരട്ടിയായി ഉയർന്നു. 2020-ന്റെ അവസാനത്തിൽ 400-ൽ നിന്നും 2021-ൽ 700 ആയി ഫാമിലി ഓഫീസുകളുടെ എണ്ണം ഉയർന്നതായാണ് റിപ്പോർട്ടുകൾ.