ലഹരിമരുന്ന് കേസില്‍ കനേഡിയന്‍ പൗരന്മാര്‍ക്കു വധശിക്ഷ നടപ്പാക്കി ചൈന. കനേഡിയന്‍ പൗരന്മാരെ ചൈനയില്‍ വധശിക്ഷയ്ക്കു വിധേയമാക്കിയതു നിയമാനുസൃതമായെന്നു ചൈന. ലഹരിമരുന്നുമായി ബന്ധപ്പെട്ട കുറ്റകൃത്യങ്ങളുടെ പേരിലാണു കനേഡിയന്‍ പൗരന്മാര്‍ക്കെതിരെ വധശിക്ഷ നടപ്പാക്കിയത്.

''ലഹരിമരുന്നുമായി ബന്ധപ്പെട്ട കുറ്റകൃത്യങ്ങള്‍ ചെറുക്കേണ്ടത് എല്ലാ രാജ്യങ്ങളുടെയും ഉത്തരവാദിത്തമാണ്. ചൈന നിയമവാഴ്ചയില്‍ അധിഷ്ഠിതമായ രാജ്യമാണ്. എല്ലാ രാജ്യങ്ങളില്‍നിന്നുള്ള പ്രതികളെയും ചൈനയില്‍ തുല്യാരായാണു പരിഗണിക്കുന്നത്. നിയമത്തിനനുസരിച്ച് കേസുകള്‍ ന്യായമായി കൈകാര്യം ചെയ്യുന്നു. കേസുമായി ബന്ധപ്പെട്ട കക്ഷികളുടെ നിയമപരമായ അവകാശങ്ങളും കാനഡയുടെ അവകാശങ്ങളും ചൈന സംരക്ഷിക്കും'' -ചൈനീസ് വിദേശകാര്യ മന്ത്രാലയ വക്താവ് മാവോ നിങ് പറഞ്ഞു.

കാനഡയുടെ ദയാഹര്‍ജി അവഗണിച്ചു 4 പൗരന്മാരെ ചൈന വധിച്ചതായി കനേഡിയന്‍ വിദേശകാര്യമന്ത്രി മെലാനി ജോളി കഴിഞ്ഞ ദിവസം വെളിപ്പെടുത്തിയിരുന്നു. ചൈനയുടെ നടപടിയെ ശക്തമായി അപലപിക്കുന്നതായും ജോളി പറഞ്ഞു. മരണപ്പെട്ടവരുടെ കുടുംബത്തിന്റെ സ്വകാര്യതയെ മാനിച്ച് കേസിന്റെ വിശദാംശങ്ങള്‍ വെളിപ്പെടുത്താന്‍ കഴിയില്ലെന്നും ജോളി വ്യക്തമാക്കി.

കാനഡയിലെ ഗ്ലോബ് ആന്‍ഡ് മെയില്‍ പത്രത്തിന് നല്‍കിയ പ്രസ്താവനയിലും ചൈന വധശിക്ഷകളെ ന്യായീകരിച്ചു. ലഹരിമരുന്ന് സംബന്ധമായ കുറ്റകൃത്യങ്ങള്‍ സമൂഹത്തിന് അത്യന്തം ഹാനികരവുമായ കുറ്റകൃത്യമായാണ് ലോകമെമ്പാടും കണക്കാക്കുന്നത്. ലഹിമരുന്നുമായി ബന്ധപ്പെട്ട കുറ്റകൃത്യങ്ങള്‍ക്ക് ചൈന എപ്പോഴും കടുത്ത ശിക്ഷകള്‍ നല്‍കുമെന്നും വ്യക്തമാക്കി.