പിറന്നാളിന് ദിവസങ്ങള്‍ മാത്രം ശേഷിക്കെ മകളെ ബലാത്സംഗം ചെയ്ത ശേഷം അതിക്രൂരമായി കൊലപ്പെടുത്തിയ കേസില്‍ പിതാവ് പിടിയില്‍. യുഎസിലാണ് സംഭവം. 14-ാം പിറന്നാളിന് ദിവസങ്ങള്‍ മാത്രം ശേഷിക്കെയാണ് കെയ്മാനി ലാറ്റിഗ്യൂ എന്ന പെണ്‍കുട്ടിയുടെ മൃതദേഹം കത്തിക്കരഞ്ഞ നിലയില്‍ ഒഴിഞ്ഞ കെട്ടിടത്തിന് സമീപം കണ്ടെത്തിയത്. കുട്ടിയുടെ പിതാവ് ഡാര്‍നെല്‍ ജോണ്‍സിനെ (33) പൊലീസ് അറസ്റ്റ് ചെയ്തിട്ടുണ്ട്.

പെണ്‍കുട്ടിയെ ബലാത്സംഗം ചെയ്ത ശേഷം കൈകള്‍ മുറിച്ചുമാറ്റിയ പ്രതി കഴുത്തറുത്താണ് കുട്ടിയെ കൊലപ്പെടുത്തിയതെന്ന് കൊളംബസ് പൊലീസ് ഡിപ്പാര്‍ട്ട്മെന്റ് ലെഫ്റ്റനന്റ് ബ്രയാന്‍ സ്റ്റീല്‍ പറഞ്ഞു. താന്‍ ഇതുവരെ കേട്ടിട്ടുള്ളതില്‍ വച്ച് ഏറ്റവും ഭയാനകമായ കേസുകളില്‍ ഒന്നാണ് ഇതെന്നും സ്റ്റീല്‍ പറഞ്ഞു.

കുട്ടിയെ കാണാതായതിന് പിന്നാലെ പിതാവ് ചില പ്രാദേശിക മാദ്ധ്യമങ്ങളില്‍ കരഞ്ഞുകൊണ്ട് മകളെ അവസാനമായി കണ്ടതിനെക്കുറിച്ച് സംസാരിച്ചിരുന്നു. മുത്തശിയോടൊപ്പമാണ് മകള്‍ താമസിച്ചിരുന്നത്. കാണാതായ ദിവസം മകള്‍ വീട്ടില്‍ ഒറ്റയ്ക്കായിരുന്നുവെന്നും ആരോ വീട് തള്ളിത്തുറക്കാന്‍ ശ്രമിക്കുന്നതായി കുട്ടി വിളിച്ച് പറഞ്ഞുവെന്നുമാണ് പിതാവ് പറഞ്ഞത്. മകളെക്കുറിച്ച് ഇയാള്‍ പൊലീസിനോട് പറഞ്ഞ പല കാര്യങ്ങളും പരസ്പര വിരുദ്ധമായിരുന്നു. സംശയം തോന്നി കസ്റ്റഡിയിലെടുത്ത് ചോദ്യം ചെയ്തപ്പോഴാണ് പ്രതി കുറ്റം സമ്മതിച്ചത്. കൊളംബസില്‍ നിന്ന് പിടികൂടിയപ്പോള്‍ പ്രതിയുടെ കയ്യില്‍ തോക്കുണ്ടായിരുന്നു.

ജോണ്‍സ് മകളെ വീട്ടിലേക്ക് കൂട്ടിക്കൊണ്ടുപോയ ശേഷമാണ് അവളെ കാണാതായതെന്ന് അമ്മ ടിയാര കാസ്റ്റണ്‍ പൊലീസിനോട് പറഞ്ഞിരുന്നു. ജോണ്‍സിന്റെ വീട്ടിലെത്തി നോക്കിയപ്പോള്‍ അവിടം അലങ്കോലമായിരുന്നുവെന്നും സോഫയ്ക്ക് സമീപം ലാറ്റിഗിന്റെ അടിവസ്ത്രങ്ങളും ഡൈനിംഗ് റൂമിലെ നിലത്ത് പൈജാമയും കണ്ടെതായും അവര്‍ പറഞ്ഞു.

കഴുത്തിലെ ഒന്നിലധികം മുറിവുകള്‍ മൂലമാണ് ലാറ്റിഗ് മരിച്ചതെന്ന് പോസ്റ്റ്മോര്‍ട്ടം റിപ്പോര്‍ട്ട് സ്ഥിരീകരിച്ചു. കഴുത്ത് ഏതാണ്ട് അറ്റുപോകുന്ന രീതിയിലായിരുന്നു പ്രതി മുറിവുണ്ടാക്കിയത്. വളരെ മൃഗീയമായ കൊലപാതകമാണിതെന്നും പൊലീസ് ഉദ്യോഗസ്ഥര്‍ പറഞ്ഞു.