എട്ടാമത് രാജ്യാന്തര ഭക്ഷ്യമേളക്ക് ഖത്തറില്‍ തുടക്കമായി. കോര്‍ണിഷിലെ ഹോട്ടല്‍ പാര്‍ക്കില്‍ ഇന്നലെ വൈകിട്ടു നാലിനായിരുന്നു ഉദ്ഘാടനം. ഖത്തര്‍ ടൂറിസം അതോറിറ്റി ആണ് 11 ദിവസം നീളുന്ന ഭക്ഷ്യമേളയുടെ മുഖ്യസംഘാടകര്‍. ഖത്തറിലെ ഏറ്റവും മികച്ച റസ്റ്ററന്റുകള്‍ അടക്കം 130 ഭക്ഷ്യശാലകളാണ് ഇത്തവണ പങ്കെടുക്കുന്നത്. രാജ്യാന്തര പ്രശസ്തിയുള്ള ഷെഫുകള്‍ തയാറാക്കുന്ന വിഭവങ്ങള്‍ മുതല്‍ തനതു ഖത്തര്‍ രുചികള്‍വരെ നുകരാന്‍ ആയിരങ്ങളാണ് ആദ്യദിവസം എത്തിയത്. ഖത്തറിന്റെ സാംസ്‌കാരിക വൈവിധ്യം പ്രകടമാക്കുന്ന കലാപരിപാടികളും ഉദ്ഘാടനത്തോടനുബന്ധിച്ച് അരങ്ങേറി. യുഎസ്, ആഫ്രിക്കന്‍, ഫിലിപ്പിനോ, തുര്‍ക്കി, ഇറ്റലി, ജര്‍മന്‍, ഇത്യോപ്യന്‍ രുചിക്കൂട്ടുകള്‍ വിളമ്പുന്ന സ്റ്റാളുകളും ഇത്തവണ മേളയിലുണ്ട്. ഈ രാജ്യങ്ങളിലെ കലാവിരുന്നുകള്‍ ആസ്വദിക്കാനും ഇതിനൊപ്പം അവസരമൊരുക്കിയിട്ടുണ്ട്. 

ജര്‍മന്‍ സ്വദേശിയും ഹോട്ടല്‍ ഫോര്‍ സീസണ്‍സിലെ മുഖ്യ ഷെഫുമായ ആന്‍ഡ്രൂ ബൊസോക്കി തയാറാക്കിയ ജാപ്പനീസ് വിഭവങ്ങളായിരുന്നു ഉദ്ഘാടന ദിവസമായ ഇന്നലെ മേളയിലെ പ്രധാന ആകര്‍ഷണം. ഈ വിരുന്നിലേക്ക് ഒരാള്‍ക്കുള്ള നിരക്ക് 1,250 റിയാലായിരുന്നു. മാഴ്‌സ മലാസ് കെംപെന്‍സ്‌കിയിലെ ജൂലിയന്‍ അല്‍ ഖല്‍ ഒരുക്കുന്ന പാന്‍അറബ് വിഭവങ്ങളാണ് ഇന്നത്തെ മുഖ്യാകര്‍ഷണം. 995 റിയാലാണ് ഇതിനു നിരക്ക്. വാരാന്ത്യങ്ങളില്‍ ഉച്ചയ്ക്കു രണ്ടുമുതല്‍ രാത്രി 11 വരെയാണ് മേള. മറ്റു ദിവസങ്ങളില്‍ രാത്രി 10നു സ്റ്റാളുകള്‍ അടയ്ക്കും. 

ഭക്ഷ്യമേളയുടെ ഭാഗമായി രാത്രി എട്ടിനു കോര്‍ണിഷില്‍ നടന്ന വര്‍ണാഭമായ വെടിക്കെട്ട് കാഴ്ചയ്ക്കും വിരുന്നൊരുക്കി. വരും ദിവസങ്ങളിലും ഇതേസമയം രാത്രി കരിമരുന്നു പ്രയോഗം നടക്കും. കുട്ടികള്‍ക്കായി പ്രത്യേക ഭക്ഷണങ്ങളും 3-ഡി അനിമേഷന്‍ പരമ്പരകളും പ്രദര്‍ശിപ്പിക്കുന്നുണ്ട്. പാചക പുസ്തകങ്ങളുടെ വലിയ ശേഖരമാണ് വായനപ്രേമികളെ കാത്തിരിക്കുന്നത്. ഖത്തറിലെ രുചിപ്രേമികള്‍ക്കായി 30 മിനിറ്റ് ദൈര്‍ഘ്യമുള്ള ആറു തല്‍സമയ പാചക പ്രദര്‍ശനങ്ങളാണ് ഷെറാട്ടണ്‍ ഹോട്ടല്‍ നടത്തുന്നത്. ഇത്തവണ 2.5 ലക്ഷം പേര്‍ ഭക്ഷ്യമേളയിലേക്ക് എത്തുമെന്നാണ് ക്യുടിഎയുടെ പ്രതീക്ഷ. ഭക്ഷ്യമേളയ്ക്കു വേദിയൊരുക്കുന്ന പാര്‍ക്ക് ഖത്തറിലെ പ്രമുഖ ആഡംബര ഹോട്ടലുകളിലൊന്നാണ്