പടിഞ്ഞാറന്‍ ലണ്ടനിലെ 27 നിലകളുള്ള ഗ്രെന്‍ഫെല്‍ ടവറില്‍ വന്‍തീപിടിത്തം. നാല്‍പതോളം അഗ്‌നിശമന സേനാ യൂണിറ്റുകളും 200 അഗ്‌നിശമനസേനാനികളും സ്ഥലത്തെത്തിയിട്ടുണ്ട്. ഇവരുടെ സഹായത്തോടെ തീയണയ്ക്കുന്നതിനുള്ള തീവ്രശ്രമം തുടരുകയാണ്. എന്നാല്‍ വളരെ വേഗത്തില്‍ തീപടര്‍ന്നു പിടിക്കുന്നത് രക്ഷാപ്രവര്‍ത്തനത്തിനു തടസ്സമാകുന്നുണ്ട്. അതേസമയം, കനത്ത പുക ശ്വസിച്ച് രണ്ടു പേര്‍ക്കു പരുക്കേറ്റു. ഒട്ടേറെ പേര്‍ കെട്ടിടത്തിനുള്ളില്‍ കുടുങ്ങിക്കിടക്കുന്നതായാണ് സൂചന.

പ്രാദേശിക സമയം പുലര്‍ച്ചെ 1.16 ഓടെയാണ് തീപിടിത്തമുണ്ടായതെന്ന് പൊലീസ് പറഞ്ഞു. കെട്ടിടത്തിന്റെ ഒരു ഭാഗം മുഴുവന്‍ തീപിടിച്ച നിലയിലാണ്. ഇവിടെനിന്നും ആളുകളെ ഒഴിപ്പിക്കുന്നതിനുള്ള ശ്രമം തുടരുകയാണ്. കെട്ടിടത്തിന്റെ രണ്ടാം നിലയിലാണ് ആദ്യം തീ കണ്ടതെന്ന് പൊലീസ് പറഞ്ഞു. വളരെ വേഗത്തിലാണ് മറ്റു നിലകളിലേക്കും തീ പടര്‍ന്നുപിടിച്ചത്. ഫ്‌ലാറ്റുകളില്‍ ജനം കിടന്നുറങ്ങുന്ന സമയത്തായിരുന്നു തീപിടിത്തം. 

കെട്ടിടത്തിന്റെ ചില ഭാഗങ്ങള്‍ തകര്‍ന്നു വീഴുന്നുണ്ടെന്നും അകത്തുനിന്ന് സ്‌ഫോടന ശബ്ദങ്ങള്‍ കേട്ടുവെന്നും ദൃക്‌സാക്ഷികളില്‍ ചിലര്‍ പറഞ്ഞു. തീപിടിത്തത്തില്‍ തകര്‍ന്ന കെട്ടിടം തകര്‍ന്നു വീഴുന്നതിനുള്ള സാധ്യതയും തള്ളിക്കളഞ്ഞിട്ടില്ല. 1974ല്‍ നിര്‍മിച്ച കെട്ടിടത്തില്‍ 120 ഫ്‌ലാറ്റുകളാണുള്ളത്.