യു.എസിലെ ന്യൂ ജഴ്‌സിയില്‍ പഠനയാത്രക്ക് കുട്ടികളുമായി പോയ സ്‌കൂള്‍ ബസ് ട്രക്കുമായി കൂട്ടിയിടിച്ച് അധ്യാപികയും വിദ്യാര്‍ഥിയും മരിച്ചു. അപകടത്തില്‍ 43 പേര്‍ക്ക് പരിക്കേറ്റു. ന്യൂജഴ്‌സിയിലെ മൗണ്ട് ഒലിവ് നഗരത്തില്‍ വ്യാഴാഴ്ച രാവിലെ 10.20ഓടെയാണ് സംഭവമുണ്ടായത്. ഇടിയുടെ ആഘാതത്തില്‍ ബസിന്റെ മുന്‍ഭാഗം പൂര്‍ണമായും തകര്‍ന്നു. പരാമസിലെ ഈസ്റ്റ് ബ്രൂക്ക് മിഡില്‍ സ്‌കൂളില്‍ നിന്ന് വാട്ടര്‍ലൂ ഗ്രാമത്തിലേക്ക് പോവുകയായിരുന്ന സ്‌കൂള്‍ ബസാണ് അപകടത്തില്‍പെട്ടത്.

അഞ്ചാം തരത്തില്‍ പഠിക്കുന്ന കുട്ടികളാണ് ബസിലുണ്ടായിരുന്നത്. ബസില്‍ 38 വിദ്യാര്‍ഥികളും ഡ്രൈവര്‍ ഉള്‍പ്പെടെ ഏഴ് മുതിര്‍ന്നവരുമായിരുന്നു ഉണ്ടായിരുന്നത്. പരിക്കേറ്റവരെ അടുത്തുള്ള ആശുപത്രിയില്‍ പ്രവേശിപ്പിച്ചു.